Talk and Text nanalo sa Ginebra sa laro sa Batangas City

  1.jpg 10.jpg 11.jpg 12.jpg 13.jpg 14.jpg 2.jpg 3.jpg 4.jpg 5.jpg 6.jpg 7.jpg 8.jpg 9.jpg

Dinumog ng libo-libong basketball fans ang Batangas City Sports Coliseum sa Game 2 ng semifinal match sa pagitan ng Barangay Ginebra San Miguel at ng winner na Talk and Text Tropang Texters sa pagpapatuloy ng 2017 PBA Governor’s Cup nitong ika- 4 ng Oktubre.

Hindi magkamayaw ang mga tagahanga ng bawat koponan sa pagsigaw at pagsuporta sa kanilang mga basketball heroes sa pangunguna ni GSM point guard LA Tenorio, na tubong Nasugbu, Batangas kung kayat nagsilbing homecoming ang naturang laro.

Naging dikit ang mga unang minuto ng labanan sa pagpapalitan ng buslo nina Ginebra import Justin Brownlee at Asia’s Best Point guard, Jayson Castro ng TNT. Subalit sa kalaghatian ng 1st quarter, nagsimula nang lumaki ang lamang ng TNT at nagtapos sa score na 31-14.

Rumatsada naman ang GSM sa 2nd quarter kung saan nagawa nilang idikit ang laban sa score na 49-47.

Pagsapit ng ikatlong quarter, halos magkagulo ang buong coliseum ng lumamang na ang Ginebra sa score na 51-50. Subalit sa pamamagitan ng solid plays, magandang teamwork ng TNT, natapos ang 3rd period sa score na 76-69 pabor sa Katropa.

Hindi na pinabayaan ng TNT na mawala ang kanilang momentum at tinapos ang Ginebra sa final score na 103-96. Sa panalong ito ng Tropang Texters nagawa nilang itabla ang serye sa 1-1.

Pinangunahan ni Brownlee ang Ginebra sa kaniyang game-high na 25 points, samantalang si Glen Rice Jr. naman ang nanguna sa TNT sa kaniyang 21 puntos. Solidong suporta ang nakuha ni Rice mula kay Castro sa kaniyang isinumiteng 20 points, samantalang si Tenorio ang nanguna sa locals ng GSM sa kaniyang 17 puntos.

Nagpasalamat naman si PBA Commissioner Chito Narvasa sa mainit na pagtanggap ng mga Batangenyo sa Philippine Basketball Association. Aniya, lahat ng laro ng PBA sa Batangas City ay sold out at talagang sinusubaybayan ng mga taga-lungsod at probinsiya.

“Isa itong Batangas City sa paborito naming puntahan. Bukod sa mababait at disiplinado ang mga fans, malawak din ang kaalaman nila sa larong basketball. Hindi lamang kung paano ito nilalaro, kundi kung paano ito nilalaro scientifically. Kaya gusto ko i-congratulate at pasalamatan si Mayor Beverley Dimacuha at Congressman Marvey Marino sa patuloy na pagsuporta ng Batangas City sa PBA,” ani Narvasa.