CLB, 2nd sa best performing school sa LET sa rehiyon

Details

Monday, 09 December 2019 - 3:43:20 PM

Nakakuha ng 57.25% passing rate sa Licensure Examination for Teachers (L.E.T) noong September 2019 exam ang Colegio ng Lungsod ng Batangas (CLB) na rank no. 2 sa Local Colleges and Universities LET Performance sa buong Region IV-A, pangalawa sa City College of Calamba na may 75.34% passing rate.

May 138 Bachelor of Science in Elementary Education graduates ng CLB kung saan 108 ay fresh graduates (2019) at mga first takers ang kumuha ng LET at 79 dito ang mga nakapasa.

Ayon kay CLB President, Dr. Lorna Gappi, sumailalim sa mas mahabang review sessions ang mga estudyante na isinagawa ng St. Louie Review Center, isa sa pinakamalaking review center at partner ng CLB. Ilang buwan bago ang graduation ng mga estudyante ay nagsimula na ang mga itong mag review sa CLB hanggang sa mag board exam.

Sinagot din ng CLB ang P2,000 sa P5,000.00 review fee ng bawat examinee. Nagkaroon ng mga mock examinations kung saan tiningnan nila ang performance ng mga examinees at tinulungan sila sa mga subjects na mababa ang score.

“Nagkaroon kami ng close supervision, monitoring sa mga batang ito. May local review din kami at comprehensive exam na part ng curriculum,” dagdag pa ni Dr. Gappi.

Inihahanda na ng CLB ang mga magtatapos ng BEED para sa kanilang board exam. Hangad ng kolehiyo na maka 100% passers sa susunod na taon.

Iniulat din ni Dr. Gappi na marami sa mga BSEEd graduates ay may mga trabaho na bago pa man lumabas ang resulta ng board examination.

Samantala magsisimulang tumanggap ng applikante para sa incoming freshmen ang CLB sa Mayo. Ang aplikante ay dapat may general average na 80% pataas at certificate of indigency mula sa City Social Welfare and Development Office. (PIO Batangas City)

• < Prev
• Next >