Maganda ang kita mula sa pagmamasahe at reflexology

Details

Wednesday, 05 April 2017 - 2:01:21 PM

Isa sa magandang pagkakitaan kahit ikaw ay nasa bahay lamang ay ang pagmamasahe at reflexology kayat isang basic training tungkol dito ang isinagawa ng Office of the City Veterinary and Agricultural Services Office(OCVAS) kung saan may 70 participants ang nakinabang.

Sumailalim sila sa pagsasanay ni Alvin Oriondo, massage trainor mula sa Roxas Foundation Inc. sa Nasugbu, Batangas. Itinuro niya ang therapeutic massage at reflexology na nakaka improve ng health condition at blood circulation.

Sa reflexology, kinakailangang alamin ang ibat-ibang points ng paa at kamay na konektado sa mga bahagi ng katawan kung saan ang mga ito ay pini press o minamasahe upang gumanda ang kondisyon ng apektadong bahagi ng katawan.

Magandang pagkunan aniya ng pagkakakitaan ang pagmamasahe at masasabing ang mga masahista ay isa sa malalakas kumita ngayong nauuso ang mga spa at wellness center. Kahit sino ay maaaring sumubok nito bastat physically fit.

Kahit nasa bahay lamang, maaari itong pagkakitaan sa pamamagitan ng paggamit ng social media upang makakuha ng mga customer.

Ayon kay Aling Precy Bacal, 57 taong gulang, sa kanyang edad ay interesado pa din syang matuto ng reflexology at hangad niya na sa hinaharap ay magamit upang pagkakitaan ang kanyang natutunan.

Payo niya na magkaroon ng magandang attitude at dedikasyon sa trabaho upang mas mapalago ang larangang ito. Dapat ding magkaroon ng tiwala sa sarili at maniwala na sila ay mga instrumento ng Diyos upang makapagpagaling ng karamdaman.

Kabilang sa mga nagtapos at tumanggap ng certificates sa pagsasanay ang mga residente ng barangay Dumantay, ilang Instructional Managers at mga estudyante ng Alternative Learning System (ALS) kung saan maaari nilang magamit ito sa pag-aaplay sa trabaho. (PIO Batangas City)

• < Prev
• Next >