Donn Ramos road gagawin na

  1.jpg 2.jpg

Sisimulan na ng pamahalaang lungsod sa January 24, Miyerkoles, ang pagsasaayos at rehabilitasyon ng karsada sa may Donn Ramos, simula Lion’s marker hanggang sa may Carpio Road ng brgy. Kumintang Ibaba kung kayat magkakaroon ng rerouting upang bigyang daan ang proyektong ito.

Ayon kay City Engineer Adela Hernandez, ang gagawing kalye ay may haba na 150 metro, lapad na mula 6.75 -8.6 na metro at pakakapalin ng may .3 meters o 12 inches upang ito ay higit na matibay kahit daanan ng mga mamalaking trak. Ang proyekto ay tatagal ng 20 araw kung saan 18 oras ang trabaho bawat araw. Ito ay inaasahang matatapos sa February 14.

Ayon sa Transportation Development and Regulatory Office(TDRO), magkakaroon ng pansamantalang pagsasara ng mga kalye sa Gov. Carpio (Don Ramos) corner Roxas Road at sa may kanto ng 7-11, sa may dating terminal ng N. Dela Rosa. Dahil dito ay gagawing two-way ang Roxas Road at Telecom Road na maari lamang daanan ng mga magagaang sasakyan (light vehicles). Ang mga malalaking trak, tanker at iba pa na patungo sa mga industriya sa baybaying barangay ay pansamantalang dadaan sa mga bayan ng Ibaan, Rosario at Taysan.

Nagkaroon ng pagpupulong ang TDRO at mga kinatawan ng mga apektadong industriya tulad ng Pilipinas Shell Petroleum Corp., JG Summit, First Balfour Inc. at iba pa. Dito ay ipinaliwanag ng hepe ng TDRO na si Engr. Francis Beredo ang pansamantalang pagbabago ng ruta para sa mga malalaki at mabibigat na sasakyan. Hiniling rin niya ang pang unawa ng mga dumalo sa maaring epekto ng pansamatalang rerouting sa kanilang hanapbuhay.

Napagkasunduan na magkakaroon ng koordinasyon ang TDRO at Batangas City PNP sa kapulisan ng mga bayan ng Ibaan, Rosario at Taysan kung saan mag re reroute ang mga trak at tankers ng mga nasabing industriya para sa seguridad ng mga ito. Nakatakda na ring simulan ang pagsasaayos ng iba pang kalye sa Poblacion at sa rural barangays sa lungsod sa huling linggo ng Pebrero o unang linggo ng Marso matapos ang pagsasaayos ng mga dokumento at bidding para dito. (PIO Batangas City)