Kahulugan ng Sto. Nino sa mga bata ipinakikita sa Children’s Art Competition

  1.jpg 2.jpg 3.jpg 4.jpg 5.jpg 6.jpg 7.jpg 8.jpg

BATANGAS CITY-Sa mata ng mga bata, ang Sto. Nino ay may espesyal na kahulugan base sa kanilang pananaw at values sa buhay at ito ay makikita sa taunang Children’s Art Competition ng itinataguyod ng pamahalaang lungsod sa pangangasiwa ng Cultural Affairs Committee at sa pakikipagtuwang ng SM City Batangas.

Ang likha ng 12 taong gulang na si Kristine Garcia, grade 6 student ng Sta Rita Elementary School, ang nagwagi ng unang pwesto sa patimpalak na ito na ginanap sa Teachers Conference Center ngayong ika-9 ng Enero.

Ang pagmamahalan sa pamilya ang mensahe ng winning piece ni Garcia na akma sa temang “Higit pa sa ginto ang maibibigay ko sa Sto Nino”. Tumanggap siya ng cash prize na P5,000 at gold medal.

Nagsilbing coach/trainor ni Garcia ang kanyang gurong si G. Efren Guinoban.

Ikalawang pwesto naman ang nakamit ni Elysa Macaraig ng St Bridget College, at 3rd prize si Empress Elerie Delgado mula sa Alangilan Central School.

Gamit ang oil pastel at illustration board, dalawang oras ang ibinigay sa 54 na kalahok mula sa public at private schools upang makalikha ng artwork.

Naging batayan sa pagpili ng mga nagwagi ang “ relevance of the content to the theme, lay-out and presentation and originality.”

Ayon sa mensahe ng vice chairman ng Cultural Affairs Committee na si Eduardo Borbon, ang nasabing kompetisyon ay hindi lamang kaugnay ng pagdiriwang ng kapistahan ng Mahal na Patrong Sto Nino, ito din aniya ay upang maishowcase ang talent ng mga kabataan sa pagguhit.

Ang paggagawad ng parangal ay ginampanan ni Secretary to the City Mayor Reginald Victor Dimacuha.

Nagsilbing hurado ang mga visual artists na myembro ng Grupo Sining Batangueno na sina Loriel Castillo ng Bauan, Joseph Albao ng Padre Garcia at ang Chairman ng Board of Judges na si Aquilino Acasio ng Lemery.
Pinayuhan ni Acasio ang mga batang artists na palagiang magpractice at gumamit ng makabagong teknolohiya partikular sa pamamagitan ng internet tulad ng you tube upang higit na mapalawig ang kanilang kaalaman at ma “enhance” ang angking husay sa pagguhit.

Pagkatapos ng kompetisyon ay nagbigay ng demonstration ang mga hurado sa paggawa ng artwork sa feltpaper na syang gagamiting materyales sa pagguhit sa Children’s Art competition sa susunod na taon.

Ang mga paintings ay ieexhibit sa SM City Batangas lobby mula January 12 hanggang 16, 2019. (PIO Batangas City)