Blended learning system, matagumpay na naipatupad sa Batangas City

Details

Monday, 21 June 2021 - 4:04:48 PM

Mahalaga ang papel na ginampanan ng mga magulang sa matagumpay na implementasyon ng blended learning system ng Department of Education (Dep Ed) sa mga mag-aaral ng pampublikong paaralan sa lungsod. Ito ang binigyang diin ni Schools Division Superintendent Dr. Zaldy Bolaños sa kanyang panayam sa programang PIO ang Lingkod N’yo sa Radyo Totoo, June 21.

Inamin ni Dr. Bolaños na noong una ay nahirapang mag adjust ang mga guro, estudyante at kanilang mga magulang sa nabanggit na sistema sa pagpapatupad nito sa pagbubukas ng klase noong 2020 dahil sa kinakaharap na pandemya ng bansa. Dahil aniya sa kooperasyon at pagtutulungan ng mga ito, naging maayos ang school year 2020-2021 na magtatapos sa July 10-15.

Idinagdag pa niya na malaking tulong ang pakikiisa ng mga magulang sa online meetings at trainings ng schools division office (SDO) hinggil sa tamang paggabay sa mga online classes sa mga learners.

“Kahit mga working parents ay naglaan ng panahon para makadalo sa virtual meeting at huntahan”, sabi ni Dr. Bolaños. Malaki rin aniya ang naging responsibilidad at sakripisyo ng mga guro mula sa paghahanda ng modules at iba pang materials, muling pagkuha, patse-tsek hanggang sa evaluation at assessment ng mga ito.

Tuloy-tuloy din sila sa pagdalo sa mga pagsasanay sa online teaching. May pagkakataon rin aniyang personal na pinupuntahan ng mga ito ang kanilang mga estudyante sa kani-kanilang tahanan kung ang mga ito ay hindi makadalo sa klase dahil sa problema sa internet connection.

Lubos ang pasasalamat ng pamunuan ng SDO Batangas City kina Mayor Beverley Dimacuha at Congressman Marvey Mariño sa suportang ipinagkaloob ng mga ito partikular ang pagpapagawa ng mga school buildings at pagkakaloob ng mga laptop para sa mga guro at tablets naman para sa mga junior at senior high school students.

Nagbigay din ang mga ito ng school supplies para sa mag-aaral sa elementarya. May proposal ang SDO na magkaloob din ng tablets para sa elementary students para magamit nila sa online classes.

Pinag-aaralan na sa ngayon ng DepEd Batangas City ang mungkahing limited face-to-face classes sa susunod na school year, 2021-2022 na nakatakdang magbukas sa Agosto o Setyembre. Kung papayagan, titiyakin dito ang istriktong pagpapatupad ng health and safety protocols. (PIO Batangas City)

• < Prev
• Next >