Police Visibility Strengthened

Bilang tugon sa sunod-sunod na ulat sa nangyari umanong bullying at extortion sa labas ng ilang paaralan sa lungsod ng Batangas, isang pagpupulong ang isinagawa ng City Peace and Order Council noong ika-10 ng Pebrero sa Gusali ng Kalikasan at Kapayapaan na dinaluhan ng mga konsernadong ahensiya ng pamahalaan at ilang pribadong sektor.

Ang naturang pagpupulong ay mula sa inisyatibo ni Council Chairman Mayor Eduardo B. Dimacuha upang pangalagaan ang kapakanan ng mga estudyante sa lungsod.

Ayon kay Atty. Victor Reginald Dimacuha, lubhang nakakaalarma ang mga nangyayaring ito sa mga paaralan lalo pa at nakatakdang magbukas ang sangay ng Philippine Science Highschool sa buwan ng Hunyo.

Subalit aniya, naniniwala siya na sa pagtutulungan ng mga nasa Peace and Order Council ay magkakaroon ng agarang solusyon ang mga ito.

Ilan sa mga napag-usapan bukod sa bullying at extortion sa mga paaralan ay ang pagpapalakas ng police visibility sa bawat paaralan at establisimiento.

Tiniyak ni Batangas City PNP Chief Manuel Castillo na magdaragdag siya ng mga tauhan upang higit na masubaybayan ang mga nasabing mga lugar.

Nakiusap din siya sa mga pamunuan ng eskwelahan na magkaroon ng close coordination sa kaniyang tanggapan upang agad silang makaaksyon kung mayroong problema sa kanilang paaralan.

Napagkasunduan din na magkakaroon ng hiwalay na na pagpupulong ang PNP, Fiscal’s Office, Defense and Security Services (DSS), Traffic Development and Regulatory Office (TDRO) at mga Barangay officials upang talakayin ng mas malalim ang bullying at makagawa ng plano upang matigil ito.

Ilan sa mga kinatawan ng paaralan na lumahok sa meeting ay mula sa Saint Bridget Colleges, University of Batangas, Batangas National Highschool, Batangas State University at kinatawan mula sa Department of Education.

Bukod sa mga school officials, dumalo rin sa pagpupulong ang Department of Interior and Local Government (DILG), PNP, TDRO, DSS, Prosecutor’s Office, Armed Forces of the Philippines, Sangguniang Panglungsod, mga myembro ng media at ilang estudyante sa lungsod. (JERSON J. SANCHEZ, PIO Batangas City)


police.jpg police2.jpg police3.jpg