Mga posibleng tourism destinations sa barangay Talumpok, binisita ng DOT

Details

Thursday, 16 June 2022 - 2:02:45 PM

Binisita ng mga participants at trainors ng Tourist Reception and Guiding Techniques Seminar ang mga tourist spots sa barangay Talumpok Silangan noong June 15 bilang huling bahagi ng kanilang tatlong araw na pagsasanay.

Layunin nito na makita ang kagandahan at ang potensyal ng nasabing lugar upang maging isang tourist destination.
Unang binisita ng grupo ang Talumpok Silang Lifestyle center ng mag-asawang Zenaida at Robin Willison.
Iprinesenta ng mga ito ang itinerary ng kanilang tour package sakaling tuluyan ng buksan ang turismo ng Talumpok.
Pinuntahan din nila ang herb garden kung saan ipinabatid naman sa kanila ang mga benepisyo ng bawat halamang nakatanim gayundin ang Gregoria Hall.

Kasunod na binisita ng mga participants ang Amatong Falls na isa lamang sa mga talon na matatagpuan sa barangay Talumpok Silangan.
Nilibot din nila ang Mt. Banoy kung saan isinagawa sa view deck dito ang huling lecture ng tour guiding seminar.
Ayon sa mga resource speakers mula sa Department of Tourism (DOT), malaki ang potensyal ng mga nasabing lugar partikular ang Mt. Banoy para dayuhin ng mga local at foreign tourists.

Kailangan lamang anila na i-develop pa ito, magkaroon maayos na itinerary at ihanda ang mga residente.
Ginawaran ng certificate of appreciation ang mga speakers bilang pasasalamat ng pamahalaang lungsod.
Ang nasabing tour guiding seminar ay pinamahalaan ng City Tourism Office sa pakikipag-ugnayan sa barangay council ng Talumpok Silangan. (PIO Batangas City)

• < Prev
• Next >