Kahandaan ng lungsod sa panahon ng kalamidad, tinalakay sa full council meeting

Details

Wednesday, 22 June 2022 - 1:02:00 PM

Mga proyekto at hakbang sa paghahanda sa panahon ng tag-ulan at pagdating ng mga kalamidad sa lungsod ang tinalakay sa full council meeting ng City Disaster Risk Reduction and Management Council (CDRRMC) sa pangunguna ni CDRRMC Chairperson Mayor Beverley Dimacuha, June 22.
Ang mga ito ay ang clearing operations ng mga drainage at canal, repair ng manhole cover, improvement ng drainage na isinasagawa ng City Engineers Office (CEO) sa mga pangunahing lansangan at ilang barangay sa lungsod upang maiwasan ang pagbaha.

Nagsagawa rin sila ng declogging ng mga kanal sa Rizal Avenue Extension, Evangelista St. at sa Poblacion 23 gayundin ang pagrepair ng canal center at pathway sa Sitio Ferry kaalinsabay ng cutting at bundling ng mga kable.

Ipinabatid ni CDRRM Officer Rod dela Roca, na sa pamamagitan ni Cong. Marvey Mariño ay naglaan ng pondo ang DPWH para sa pagsasaayos ng drainage system sa Lions’ marker at De Joya Subdivision sa Kumintang Ilaya upang maiwasan ang pagbaha.

Nagsasagawa ng clean-up drive ang barangay Balete, Dumantay at San Miguel at pagpuputol ng mga sanga ng punongkahoy na maaring magdulot ng panganib kung may malakas na hangin at pag ulan.

Ayon kay OIC- City Engineer Dwight Arellano, inaasahan na maiilipat na sa tamang lugar ang poste ng PLDT sa bahagi ng Colegio ng Lungsod Batangas (CLB) sa Arietta Road sa susunod na linggo.

Nakikipag-ugnayan naman ang DPWH sa MERALCO para sa paglilipat ng nakaharang na poste ng kuryente sa brgy. Balagtas.
Ayon sa MERALCO, may 98 poste ng kuryente na ang kanilang inalis at 101 poste naman ang itinayo sa tamang lokasyon mula pa noong taong 2018 habang 49 poste ang nakatakdang tanggalin at 54 naman ang itatayo.

Ipinaalam naman ng kinatawan ng PrimeWater na 93% complete na ang replacement at extension ng pipeline sa P. Burgos St.
Aprubado na rin aniya ang proposed water source development sa barangay Sico na magbibigay na sapat na suplay ng tubig sa nasabing mga lugar.
Binigyang diin ng PrimeWater na may regular water testing silang isinasagawa kung saan nananatiling pasado at ligtas ang kanilang suplay ng tubig sa lungsod.

Tampok din sa naturang pagpupulong ang pag-apruba sa Disaster Risk Reduction and Management Plan 2020-2025 kung saan nakapaloob na dito ang paghahanda para sa mga pandemya, City Contingency Plan 2020-2025 at ang Earthquake Contingency Plan.
Ang mga ito ay ii-endorso sa Sangguniang Panlungsod para pagtibayin.

Nagpaabot ng pasasalamat si Mayor Dimacuha sa lahat ng miyembro ng council lalo’t higit sa pribadong sektor sa pakikipagtuwang para sa naturang paghahanda. (PIO Batangas City)

• < Prev
• Next >