Ginawaran sa ikalawang pagkakataon ng Green Banner Seal of Award ang Batangas City sa isinagawang 2023 Regional Nutrition Awarding Ceremony for CALABARZON na ginanap sa Seda Hotel Nuvali Sta Rosa Laguna noong August 1.

Ang Green Banner award ay ang pinakamataas na parangal na ibinibigay sa lokal na pamahalaan kaugnay sa mahusay na pagpapatupad at pangangasiwa ng mga nutrition program.

Ayon kay City Nutrition Officer Eva Mercado, bumaba ang malnutrition rate sa lungsod dahil sa iba’t ibang health nutrition programs na may layuning makamit ang zero malnutrition rate.

Kabilang sa mga programang ito ang supplementary feeding, ang pamamahagi ng micronutrient supplements tulad ng Vitamin A at Iron syrup, ang information at education campaign sa mga magulang kung saan itinuturo ang pagbibigay ng wastong nutrisyon.

Kaugnay nito, nahirang si Mercado bilang isa sa mga Regional Outstanding City Nutrition Action Officer (CNAC).

Finalist naman sa 2023 Regional Outstanding Barangay Nutrition Scholar si Noriemi Macatangay ng barangay Balete.

Ang pagpili sa mga nagwagi ay isinagawa sa pamamagitan ng pagbisita ng mga myembro ng Regional Nutrition Council CALABARZON sa ibat-ibang lungsod at lalawigan upang magsagawa ng ebalwasyon at matutukan ang implementasyon ng nutrition program.

Ang naturang okasyon ay dinaluhan nina Asst Secretary and Executive Director IV ng NNC Dr Azucena Dayanghirang at Director IV –DOH CHD Dr Ariel Valencia at ni Regional Nutrition Proram Coordinator ng NNC CALABARZON na si Carina Santiago.