Pinangasiwaan ni Mayor Beverley Dimacuha ang panunumpa sa tungkulin ng mga bagong halal na Barangay at Sangguniang Kabataan (SK) officials ng 105 barangay sa Batangas City, November 20. Kasama ni Mayor Dimacuha sa naturang oathtaking si Congressman Marvey Mariño. Kapwa pinaalalahanan nina Mayor at Congressman ang mga opisyales na maging mabuti at tapat na lider sa kani-kanilang barangay. Tiniyak din nila ang kanilang suporta sa mga isasagawang proyekto at gawain ng mga ito para sa kapakanan ng barangay.

Hiniling rin ni Mayor sa mga opisyal na maging disiplinado, manatiling simple at iwasang maging barako sa kanilang barangay. “Kape lamang ang barako sa Batangas, ipakita ninyo ang inyong tapang sa pagsugpo ng mga iligal na gawain sa inyong barangay, at kami ay nasa likod ninyo” sabi ni Mayor Dimacuha.

Pinaalalahanan naman sila ni Cong. Mariño na dapat maging handa sa mga pagsubok na maaari nilang kaharapin. Marami aniya silang responsibilidad na dapat gampanan. Hinikayat din niya na magkasundo na yaong mga naging magkakalaban sa posisyon noong eleksyon at magkaisa ang lahat para sa pag-unlad ng barangay.

Dumalo sa okasyong ito sina Vice Mayor Alyssa Cruz, City Councilors, Board Members Claudette Ambida at Bart Blanco, Vice Governor Mark Leviste, dating Vice Mayor, Dr. Jun Berberabe, mga dating konsehal ng lungsod at City DILG Director, Esther Dator. (PIO Batangas City)