TINGNI: Inilahad ng Incident Management Team (IMT) para sa Street Party at City Fiesta 2026 ang kanilang mga plano at kahandaan para sa mga aktibidad na gaganapin sa Enero 15 at 16.

Sa isinagawang IMT Operational Briefing ngayong Enero 14, tiniyak ng Batangas City Police Station (BCPS) na magtatalaga ng sapat na bilang ng mga pulis sa iba’t ibang lugar upang masiguro ang kaligtasan at kaayusan ng lungsod.

Magsasagawa rin ng paneling sa mga event area ang BCPS katuwang ang Philippine Coast Guard.

Nakaantabay naman ang mga medical team mula sa City Health Office (CHO) at nakipag-ugnayan na rin sa mga ospital sakaling magkaroon ng mga emergency.

Handa rin ang mga kagamitan at sasakyan ng Pamahalaang Lungsod, gayundin ang mga street sweeper para sa pagpapanatili ng kalinisan sa mga lugar na pagdarausan ng mga aktibidad.

Ipinabatid din ng Transportation Development and Regulatory Office (TDRO) ang pansamantalang pagsasara ng ilang kalsada, kabilang ang Rizal Avenue corner P. Burgos at P. Dandan corner P. Panganiban, bukas ganap na alas-3:00 ng hapon para sa Street Party.

Inihayag din ang re-routing ng mga pampublikong sasakyan kaugnay ng City Fiesta Parade sa Enero 16.

May anunsyo ukol dito ang TDRO sa kanilang Facebook page.

Nagpahayag din ng kanilang kahandaan ang iba pang miyembro ng IMT tulad ng Bureau of Fire Protection (BFP), Discipline Safety and Security Office (DSSO), City Disaster Risk Reduction and Management Office (CDRRMO), Public Information Office (PIO), at iba pa.

Mariing pinaalalahanan ng IMT ang publiko na panatilihin ang disiplina at kaayusan, at iwasan ang anumang uri ng gulo, lalo na ang mga insidenteng may kinalaman sa pag-inom ng alak.

Babala ng IMT, maaaring arestuhin ang sinumang lalabag sa umiiral na mga batas at ordinansa.

Mahigpit ding ipinagbabawal ang pagpapalipad ng drone at anumang flying objects sa mga event area.

Tanging ang BCPS lamang ang may pahintulot na magpalipad ng drone para sa security at safety monitoring.

Ang IMT ay binuo para sa dalawang nabanggit na aktibidad bilang tugon sa tagubilin ni Mayor Marvey Mariño upang matiyak ang maayos at ligtas na pagdaraos ng kapistahan ng lungsod.

Tumatayong Incident Commander nito si OIC–Chief of Police PLTCOL Ira Morello. (PIO Batangas City)