TINGNI: Simula pa noong 2018 ay ipinagbabawal na ng Pamahalaang Lungsod ng Batangas ang pagkakabit ng banderitas at paggamit ng mga lobo tuwing may okasyon sa mga barangay, alinsunod sa Environment Code (E-Code) Art. XII Section 78,84-85.

Kaugnay nito, patuloy ang paalala ng Office of the City Environment and Natural Resources Office (OCENRO) sa pamamagitan ng mga pagpupulong at regular na pagpapadala ng liham sa mga punong barangay at maging sa mga parokya upang matiyak ang mahigpit na pagsunod sa nasabing patakaran.

Ipinagbabawal ang paggamit ng banderitas, lobo, at iba pang katulad nito upang maiwasan ang pagdami ng basura na karaniwang napapabayaan matapos ang mga selebrasyon. Bukod sa nagdudulot ng kalat, ang mga ito ay maaaring mapunta sa mga daluyan ng tubig at kanal na nagiging sanhi ng pagbabara at pagbaha, gayundin ay banta sa kalikasan at mga hayop.

Bilang alternatibo, hinihikayat ang paggamit ng mga makukulay na bandilang yari sa tela na maaaring magamit nang paulit-ulit at ilagay sa gilid ng mga kalsada. Sa ganitong paraan, napapanatili ang kasiyahan ng pagdiriwang habang isinusulong ang pangangalaga sa kapaligiran at pagbabawas ng basura.

Para sa iba pang impormasyon, makipag-ugnayan sa OCENRO - 723 8844 (PIO Batangas City)