TINGNI: Maraming indibidwal at pamilya ang nakararanas ng emosyonal na pagkabalisa na maaaring dulot ng iba’t ibang personal, sosyal, ekonomiko, at pampamilyang suliranin.

Subalit, marami sa mga alalahaning ito ang hindi agad natutugunan dahil sa stigma, kakulangan ng kaalaman, at limitadong access sa mga naaangkop na serbisyo at suporta.

Bilang tugon sa pangangailangang ito, ipinag-utos ni Mayor Marvey Mariño ang higit pang pagpapalakas ng pagtugon ng pamahalaang lungsod sa mga usaping may kaugnayan sa mental health at kinikilala na ang pagtataguyod ng emosyonal na kagalingan ay hindi lamang responsibilidad ng mga propesyonal sa kalusugan kundi isang sama-samang pananagutan ng komunidad.

Kaugnay nito, inaprubahan ng mga miyembro ng Sangguniang Panlungsod ang PROJECT HOPE (Holistic Outreach for Prevention and Emotional Wellness), isang sistema ng suporta para sa referral, outreach, at pagtataguyod ng emosyonal na kagalingan sa buong lungsod.

Layon ng Project HOPE na iniakda ni Coun. Claudette Ambida na magbigay ng accessible at koordinadong mekanismo kung saan ang mga indibidwal na nakararanas ng emosyonal o psychosocial difficulties ay maaaring matukoy, mabigyan ng naaangkop na paunang suporta, mai-refer sa mga kwalipikadong propesyonal, at masubaybayan para sa kinakailangang follow-through.

Sa ilalim ng programa, ang Mayor’s Action Center (MAC) ang magsisilbing coordinating office para sa Psychosocial Support and Mental Health Referral System.

Ang Office of the City Health Officer (OCHO) naman ang magbibigay ng technical assistance at mangunguna sa paghahatid ng mental health at psychosocial support services, habang ang Office of the City Social Welfare and Development Officer (OCSWDO) ang magsisilbing pangunahing tanggapan para sa mga usaping may kinalaman sa social welfare at community-based support ng Project HOPE.

Alinsunod sa mga umiiral na batas, tuntunin, at regulasyon, maaari ring kumuha ang pamahalaang lungsod ng mga accredited third-party service provider upang higit na mapahusay ang pagpapatupad ng programa.

Isasagawa ang Project HOPE alinsunod sa mga naaangkop na batas at patakaran hinggil sa confidentiality, data privacy, at wastong pangangasiwa ng sensitibong personal na impormasyon.

Sa pamamagitan ng Project HOPE, inaasahang higit na mapangangalagaan ang emosyonal at sikolohikal na kalusugan ng mga Batangueño, kasabay ng patuloy na pagpapaigting ng mga serbisyong pang-emergency ng lokal na pamahalaan tungo sa isang mas ligtas, mas maalaga, at mas matatag na lungsod. (PIO Batangas City)