Nakatakdang maglabas ng fare matrix ang Transportation Development and Regulatory Office (TDRO) para sa mga tricycle drivers sa lungsod sa mga susunod na araw.

Ayon sa Traffic Operations and Maintenance Section Chief ng nabanggit na tanggapan na si Cris Mark Banaag, ito ay bunsod ng dumaraming bilang ng mga reklamong kanilang natatanggap hinggil sa overcharging.

Maglalagay aniya sila ng mga tarpaulin sa mga terminal ng traysikel upang maging gabay ng mga drayber, operators at mga pasahero.
Nakapag-isyu na aniya sila ng fare guide noong mga nakaraang taon subalit dahil sa pagtaas ng presyo ng gasolina ay kailangan itong iadjust.
Sinabi din niya na ang naturang hakbang ay alinsunod sa Batangas City Traffic Ordinance of 2020.

Isinasaad ng Article XXXII Sec 166 at Article XXXIII Sec 184. 1 na ang unang dalawang kilometro mula sa origin patungo sa destinasyon ay nagkakahalaga ng P 12.00.

Para sa mga estudyante, senior citizens at PWDs, ang kanilang babayaran ay P 9.60 lamang. Isinasaad din nito na dalawang pasahero lamang ang dapat lulan ng traysikel at bawal ang mga rider. Kung nais naman ng pasahero na special trip, pang dalawang tao ang dapat bayaran o katumbas nito ay P 24.00. Maaaring magbigay ng karagdagang bayad subalit hindi maaaring magdemand ng karagdagang singil ang mga drayber.

Ang mga designated terminal ng G1 at G2 ay sa may Plaza Mabini, G3 sa D.Silang sa may BANAHIS at ang bumabyahe ng G4 ay sa Arce Subdivision.
Binigyang diin ni Banaag na maaaaring matanggalan ng prangkisa ang sinumang mapapatunayang lalabag dito at ang mga tumatangging magsakay ay papatawan ng karampatang multa.

Hangad nila na maipatupad ang ordinansa para sa kapakanan ng mga mananakay. Ipinabatid din niya na on-going ang kanilang pag-iisyu ng prangkisa sa mga colorum tricycles bilang proteksyon na rin sa mga pasahero. Maaaaring tumawag sa Hotline ng TDRO o mag message sa kanilang FB page kung may reklamo.

Samantala, patuloy pa din ang nabanggit na tanggapan sa pagsasagawa ng non stop clearing operations upang tanggalin ang mga obstructions, eye sores at illegal structures upang maging mas maluwang ang mga kalye at mabigyan ng kaalwanan ang mga pedestrian.
Hinikayat din niya na bukod sa pag-iingat sa pagmamaneho, mahalaga aniya ang pagkakaroon ng disiplina upang maiwasan ang mga road accidents. (PIO Batangas City)