Gabi ng parangal para sa mga child development workers idinaos

Details

Monday, 25 June 2018 - 4:15:49 PM

BATANGAS CITY Idinaos ng City Social Welfare and Development Office (CSWDO) ang Gabi ng Pagdiriwang ng Linggo ng Child Development Workers 2018 noong June 22 bilang pagkilala sa papel na kanilang ginagampan bilang tagapagturo, tagapagalaga at tagapaglinang ng total development ng mga batang edad 0-4 taon.

Ito ay may temang “Sa Pagpapaunlad at Pagbabago ng Kabataan, Child Development Worker na may Malasakit ang Kailangan”.

Sa mensahe ni Mayor Beverley Rose Dimacuha na binasa ng kanyang kinatawan na si Eric Sanohan, hepe ng Local Economic Investment Promotion Center, sinabi niya na “ang gabing ito ay selebrasyon para sa ating mga child development workers, saludo ako sa inyong lahat, at dapat lang kayong ipagmalaki dahil hindi basta-basta ang inyong inakong responsibilidad. Nasasalamin sa inyo ang pagkakaroon ng kabutihang loob at tunay na dedikasyon sa pagbibigay ng kalinga sa mga batang nasa inyong pangangalaga.”

Umaasa rin ang Mayor na mahusay na magagabayan ng mga child development workers ang mga bata na magkaroon ng magandang asal at lumaking mabuting mamamayan.

Tinanghal bilang pinakamahusay na Child Development Worker (CDW) 2018 si Marilou Barte ng SoroSoro Ibaba Child Development Center dahil sa ipinakita nitong dedikasyon at sipag sa trabaho at tagal sa serbisyo kung saan siya ay naglilingkod na ng 15 taon.

Ilan sa mga naging criteria sa pagpili sa kanya ay ang creativity/resourcefulness, punctuality, accomplishment and records, knowledge/skills/attitude as worker, at interpersonal relationship.

Napili namang Pinakamahusay na Child Development Center ang San Jose Sico CDC dahilan sa learning materials na ginagamit dito, kalinisan, kaayusan at pakikilahok ng mga magulang sa matagumpay na operasyon nito.

Si Lorena Rosales ng Tinga Itaas ang ginawaran ng parangal para sa pinakamahusay sa pagpapatupad ng programa ng Early Childhood Care and Development.

Binigyan din ng pagkilala ang 10 CDWs na nagsanay sa programa ng Early Childhood Care and Development ng National Council. Sila ay sina Gina Antes, Maria Bobadilla, Josefina Bueno, Marilou Barte, Ester Endaya, Jasmin De Castro, Gemma Frane, Felicita Maranan, Criselda Manansala at Morena Untiveros.

Ang San Isidro CDC ang pinakamahusay bilang Disaster- Friendly Child Development Center.

May anim na CDCs ang binigyan ng pagkilala sa paglahok sa pagpili sa Disaster- Friendly Child Development Center. Ang mga ito ay ang Mahabang Parang, Tinga Itaas, Pinamucan Proper, Bilogo, Banaba South at Barangay 24.

Binigyan din ng pagkilala ang mga CDWs na naglingkod sa tanggapan ng 15-19 taon, 20-24 taon, 25-29 taon at 30 taon pataas.

Pinagkalooban ng Batangas City Child Development Workers Association si City Social Welfare and Development Officer (CSWDO) Mila Española ng plake ng pagkilala dahil sa mahusay nitong pamamahala ng Early Childhood Care Development at paggabay sa mga child development workers.

Sa kasalukuyan ay may 104 CDWs sa lungsod. (PIO BATANGAS CITY)

• < Prev
• Next >