PhilHealth nagdaos ng fraud awareness forum

Details

Wednesday, 27 June 2018 - 5:11:45 PM

Sa kauna-unahang pagkakataon, nagsagawa ng Regional Multi-Sectoral Fraud Awareness Forum ang PhilHealth Regional Office IV-B sa Hotel Pontefino noong ika-26 ng Hunyo sa layuning masugpo ang insurance fraud o yaong panlilinlang ng indibidwal o grupo ng indibidwal sa programang nagseseguro sa kalusugan ng bawat Filipino.

Ayon sa PhilHealth, kabilang sa mga ginagawang paraan ng panlilinlang ng mga kawatan ay ang pagbili ng lagda o dokumento kung saan kapalit ng bayad, ang miyembro ay papipirmahin sa dokumentong nagsasaad na siya ay na-ospital bunsod ng sakit. Ang dokumentong ito ay isusumite sa Philhealth, sa pamamagitan ng ospital, upang makapag claim ng refund. Isa pang paraan ay ang malawakang pag-akit ng mga miyembrong may napipintong pagpapagamot o operasyon bilang marketing strategy ng isang pagamutan. Ang isa pa ay ang pagdagdag ng serbisyo o supplies na sisingilin sa pasyente at sa PhilHealth kahit ang mga ito ay hindi tunay na naibigay sa miyembro.

Bunga nito, posibleng tumaas ang halaga ng babayaran ng mga myembro sa pagpapagamot sa kabila ng benepisyong sagot ng PhilHealth. Hindi lubos na mapapakinabangan ng mga nararapat makinabang ang mga benepisyong nakalaan sa ilalim ng National Health Insurance Program at maaaring maapektuhan ang tiwala ng myembro sa kakayahan ng Philhealth na makapagbigay ng sapat na benepisyong pangkalusugan. Upang maiwasan ito, kailangang alamin ng mga myembro ang kanilang mga benepisyo sa pamamagitan ng case rates kung saan may nakatalagang halaga ng benepisyo sa bawat sakit at ang halagang ito ang dapat ibawas sa hospital bill ng pasyente. Ang case rates ay makikita sa web page ng PhilHealth. Dahil sa No Balance No Billing policy para sa mga indigent, sponsored at kasambahay members ng Philhealth, wala nang dapat bayaran pa kung sa pampubliko o piling pribadong pagamutan magpapagamot. Alinsunod sa polisiyang ito, dapat kumpleto ang gamut at supplies ng pagamutan. Kayat hindi dapat pabilhin ng gamut, supplies at services sa labas ng pagamutan habang naka-admit.

Sa nabanggit na forum, tinalakay ni Delio Aseron, head ng Corporate Action Center at deputy spokesperson ang roles at functions ng Corporate Action Center (CAC) na siyang nangangasiwa sa mga querries, feedback at complaints hinggil sa mga paglabag ng mga healthcare institutions, healthcare professionals at mga empleyado ng Phlhealth sa naturang ahensya. Payo ng PhilHealth na matapos magpagamot o bago lumabas sa ospital, suriing mabuti ang nilalaman ng statement of account. Huwag pipirma sa Claim form na walang laman at huwag ipahiram ang inyong PhilHealth ID o ang Member Data Record (MDR) kaninuman. Dapat ding magbayad ng premium contribution sa pinakamalapit na PhilHealth-accredited collecting agent sa inyong lugar tulad ng banko at Bayad Center.

Ang E-claims, Fraud Prevention and Control ang ipinaliwanag ni Arturo Alcantara ng Task Force Health Informatics habang ang ilan sa mga kasong naisampa ang ibinahagi ni Atty Rogelio Pocallan Jr , senior manager ng ILD.

Nagpaabot ng pasasalamat si Philhealth Acting President & CEO Dr Roy Ferrer sa lahat ng mga dumalo sa naturang pagtitipon.

Sinabi ni PhilHealth Acting President and CEO Roy Ferrer na “kailangan po namin ang kooperasyon ninyo upang maiwasan at mapaigting ang laban sa healthcare fraud at mapangalagaan ang karapatan ng mga myembro.

” Idinagdag pa niya na “financially stable and sound” ang Philhealth kayat walang dapat ipag-alala ang kanilang mga myembro at nakatitiyak ang mga ito ng mataas na kalidad na serbisyo.

Dumalo din si Philhealth Regional Vice President, PRO IVB Paolo Johann Perez na nagbigay ng welcome remarks.

Para sa anumang paglabas sa polisiya ng Philhealth, makipag ugnayan lamang sa Philhealth Anti-Fraud Team. (PIO Batangas City)

• < Prev
• Next >