Ginawaran ng Unmodified Opinion ng Commission on Audit (COA) ang pamahalaang lungsod, June 11.
Ito ang pinakamataas na rating na ipinagkakaloob ng naturang ahensya na nag-audit ng mga accounts at gastusin ng gobyerno upang matiyak na ang pondo ay nagagamit ng tama at para sa mga layuning itinakda.

Nakamit ng city government ang naturang rating mula sa 2023 Annual Audit Report (AAR) kung saan napatunayan ng Auditor na ang financial records at financial statement ng lokal na pamahalaan ay nakakasunod sa high standards, rules and regulations.

Nakita din nila na ang financial reporting ng pamahalaang lungsod ay transparent, maayos at naaayon sa accounting standards.
Malaking puntos sa natanggap na Unmodified Opinion rating ay ang “one-time cleansing” ng Property, Plant and Equipment (PPE) na pinangunahan ng City Accounting Office at General Services Department (GSD) kasama ang City Planning & Development Office (CPDO), City Engineer’s Office (CEO), City Assessor’s Office at City Legal Office.

Personal na tinanggap ni Mayor Beverley Dimacuha ang ulat mula kina COA Regional Director Atty. Chona Labraque, City Auditor Aaron Francis Vegas, at COA Supervising Auditor John Arvin Atie.

Lubos ang kanyang kasiyahan sa nakuhang marka na aniya isang kasaysayan sa lungsod at bunga ng epektibo at tapat na serbisyo ng mga kawani ng lokal na pamahalaan.

Kasama ni Mayor sa pagtanggap sa audit rating sina City Accountant Sherryl Bool, GS Officer Joyce Cantre, City Environment Officer Oliver Gonzales at City Budget Officer Manolo Perlada. (PIO Batangas City)

“