Grand Family Day idinaos ng PopCom

Details

Wednesday, 29 November 2017 - 3:38:42 PM

Magkasabay na isinagawa ng PopCom Division ng City Health Office ang kanilang maagang Christmas party at Grand Family Day para sa mga Barangay Service Point Officers (BSPO) noong November 28 sa Teachers’ Conference Center.

Ang selebrasyon ay may temang “Empowering the Community through a Well-Planned Family,” na siyang ring naging paksa ng lecture ni Konsehal Allysa Cruz, Chairman, Committee on Women and Family Welfare ng Sangguniang Panlungsod.

Ipinaliwanag ni Konsehala Cruz na lahat ng family planning methods ay ligtas at epektibo basta’t gagamitin ito sa tamang pamamaraan. Sinabi rin niya na malaki ang maitutulong ng family planning para magkaroon ng matiwasay at tahimik na komunidad. Ayon sa kanya, kung may tamang bilang at agwat ng pag-aanak, mababawasan ang kahirapan, pagkagutom, at malnustrisyon at mababawasan rin ang kriminalidad. “Pag konti po ang anak, konti lamang ang maghahati hati sa kita ng pamilya, magkakaroon ng sapat na pagkain kaya’t walang magugutom at hindi gagawa ng masama para may makain,” dagdag pa ni Konsehala Cruz.

Pinasalamatan naman ni Mayor Beverley Dimacuha ang mga BSPO na katulong ng pamahalaang lungsod sa pangangalaga ng kalusugan at nagtuturo ng tungkol sa family planning sa mga residente ng barangay. Ipinaalam din niya na mas pinalawak pa amg serbisyo ng EBD Healthcard kung saan tinutugunan na rin nito ang mga laboratory tests at diagnostic procedures.

Ipinaalala rin ni Mayor Dimacuha sa mga magulang na suportahan ang mga anak sa kanilang pagsisikap at purihin ang mga ito sa kanilang mga magagandang ginagawa. “Dahil po Grand Family Day nyo ito, gusto ko lang pong ipaalala sa inyo, na higit sa edukasyon, ang pinakamahalagang maipapamana ninyo sa inyong mga anak ay isang masaya at buong pamilya. At kung masaya ang pamilya at may magandang pundasyon ang mga anak, hindi sila makakaisip gumawa ng masama, mababawasan ang krimen sa komunidad,” sabi ng mayor.

Dumalo rin sa okasyong ito sina Acting Regional Director, PopCom Region IV, Marilyn Ogaya, Konsehal Serge Atienza at Aileen Montalbo, at Bokal Claudette Ambida.

Naging bahagi ng selebrasyon ang contest sa talento ng mga pamilya kung saan nagpagalingan sila sa husay sa pag-awit at pagsayaw. Nanalo ng unang gantimpala ang pamilya nina Noli at Lolita Mendoza mula sa Unit 4-A; ikalawang gantimpala sina Carmela at Rowena Cinco ng Unit 2 ; at ikatlo naman ang pamilya nina Ivy at Regan Bolor ng Unit 6.

Ang Batangas City na lamang ang tanging pamahalaang lokal sa buong lalawigan ng Batangas na may BSPO, kung saan ang mga ito ay may bilang na 121 at tumatanggap ng allowance mula sa pamahalaang lungsod. (PIO Batangas City)

• < Prev
• Next >