Kampeon: General Services Dept. sa court dancing, CLB/CRO sa street dancing

Details

Thursday, 25 July 2019 - 11:40:00 AM

Tinanghal na kampeon ang grupo ng mga empleyado ng General Services Department (GSD) sa ikalawang taon ng court dancing competition kung saan ito ay nagsisilbing showcase ng galing at creativity ng mga departamento ng pamahalaang lungsod.

Naging batayan sa pagpili ng mga nagwagi ay ang choreography, relevance to the theme-Batangas City Kariktan at 50-, costume at props at over all impact.

Ayon sa chairman of the board of judges na si Chinggay Bernardo, department manager ng Cultural Exchange Department ng Cultural Center of the Philippines, unanimous ang kanilang naging desiyon sa pagpili ng winners. “GSD scored high in all the criteria lalo na sa performance at choreography. Sana lahat ng LGUs may ganitong klaseng activity, very commendable ang Batangas City for staging this kind of competition, just keep the spirit alive,” sabi niya.

Binigyang diin ni General Services Officer Joyce Cantre ang pagkakaroon ng teamwork ng GSD employees. “Nagtulong tulong kami sa pagbuo ng concept, lahat ng section nagbigay ng kani- kanilang idea. Malaking factor din ang kagustuhan ng mga dancers namin na manalo kung kaya ibinigay na nila ang todo at best nila.”

Idinagdag naman ng kanilang choreographer na si Allan Jeff Evangelista na bagamat nahirapan sila na ipakita sa loob ng anim na minuto ang ibat-ibang pangyayari sa loob ng 50 taon ng lungsod, nagsagawa sila ng brainstorming at research upang magawa nila ito . Malaking bagay din aniya ang suporta ng hepe ng GSD sa kanilang pagkakapanalo. Sisikapin aniya nila na muling magkampeon sa susunod na taon.

Nanalo ng 2nd place ang mga kawani ng City Assessor’s Office na nakakuha ng P 75,000 at trophy, 3rd ang pinagsamang grupo ng Colegio ng Lungsod ng Batangas (CLB) at Civil Registrar’s Office (CRO) na tumanggap ng trophy at P P 50,000, 4th Place City Accounting Office at 5th Place ay ang City Mayor's Office.

Sa open category, ang mga mag-aaral ng Golden Gate Colleges ang nagkampeon, pangalawa ang Batangas Province High School for Culture and Arts (BPHSCA) Junior at ikatlo ang Tinga Labac Elementary School.

Ayon kay Paul John Anonuevo, choreographer ng GGC, ipinakita nila sa kanilang pagtatanghal kung paano naging maunlad ang lungsod ng Batangas sa nakalipas na 50 taon. Tampok din dito ang mga tradisyon at ipinagmamalaking produkto ng lungsod. “Sobrang saya at thankful po kami sa aming pagkakapanalo,” sabi niya.

Samantala, ang grupo ng mga kawani ng CLB/CRO ang nagkampeon sa streetdancing competition, 2nd ang City Mayor’s Office, 3rd ang Environment Office, 4th ang GSD at 5th ang City Assessor’s Office.

Sa open category, ang mga mag-aaral ng Batangas City East ang tinanghal na pinakamahusay, 2nd ang Golden Gate Colleges at 3rd ang BPHSCA Junior.

Sa mensahe ni Mayor Beverley Dimacuha sa naturang okasyon, binati niya ang mahusay na performance ng mga kawani at binigyang diin na sa paglevel up ng pagtatanghal ay maglevel up din ang mga ito sa paglilingkod ng tapat, may malasakit at disiplina sa taumbayan. “Sana ay higit nating pabilisin ang pagbibigay ng serbisyo publiko sa pagpasok natin sa susunod na limampung taon,” sabi niya. (PIO Batangas City)

• < Prev
• Next >