Makabagong teknolohiya at climate change tinalakay sa Techno Gabay Program Summit 2019

Details

Thursday, 21 November 2019 - 9:02:00 AM

Nagsilbing host ngayong taon ng tatlong araw na Techno Gabay Program (TGP) Summit 2019 ng Agricultural Training Institute (ATI) ang lalawigan ng Batangas. kung saan tinalakay ang kahalagahan ng makabagong teknolohiya sa pagsasaka upang maka adapt sa climate change.

Ayon kay Dr Rolando Maningas, ATI Region IV A information officer, “ang naturang summit ay program implementation ng ATI na naglalayong maideliver sa mga end users ang tama at angkop na teknolohiya upang magabayan sila sa kanilang farming at fishing practices.”

Ang ATI ay extension arm ng Department of Agriculture (DAR) na nagbibigay ng information, trainings at seminars sa mga magsasaka at mangingisda sa rehiyon.

“Ang nasabing pagtitipon ay culminating activity ng lahat ng Farmers Information Technology (FIT) centers sa CALABARZON. “Mayroon tayong kabuuang 57 FIT centers na nagkakatipon tipon ngayong araw na ito upang i exhibit ang kanilang produkto, i showcase ang kanilang proyekto at i highlight ang kanilang accomplishments para sa 2019,” dagdag pa ni Dr. Maningas.

Ang FIT centers sa mga local government unit ay nagkakaloob ng ibat-ibang impormasyon (IEC materials) at technical advice na makakatulong upang mapaunlad ang larangan ng pagsasaka at pangisdaan.

Sinabi ni Agricultural Training Institute IV-A Center Director Marites Cosico na musika sa kanyang pandinig ang mga accomplishments ng mga magsasaka at mga mangingisda na isang pagpapatunay aniya na isinasabuhay nila ang kanilang mga natututunan sa mga dinaluhang pagsasanay.

Ipinahayag naman ni Governor Hermilando Mandanas ang kaniyang mga plano bilang suporta sa agrikultura ng lalawigan kagaya ng pagtatayo ng isang food terminal at warehouse. Narito rin si Batangas State University President Dr Tirso Ronquillo.

Sa taong ito, naging paksa ng talakayan sa farmers’ forum na dinaluhan ng may 232 farmers ng lalawigan ay ang weather and climate information in agriculture kung saan tinalakay ng PAGASA ang ibat –bang farm weather services.

“Challenge sa farming at fishing ang climate change kaya dapat alam ng mga magsasaka at mangingisda kung ano ang mga technology na pwede nilang iadapt sa kabila ng bantang ito” sabi ni Maningas.

Nagkaroon din ng techno demo ng mga magsasaka syentista on climate information projects.

Makikita rin dito ang exhibit ng mga booths ng mga local government units sa Calabarzon kung saan tampok ang kanilang mga ipinagmamalaking produkto .

Isasagawa ang Techno Gabay Awards sa November 22 bilang pagkilala sa mga accomplishments ng mga stakeholders ng programa at sa mga outstanding FIT centers.

Ito ang ika 9th TGP na may tema ngayong taon na “Makabagong Teknolohiya sa Pagsasaka, Kahandaan sa Pagbabago ng Klima”. Ka partner ng ATI sa gawaing ito ang pamahalaang panlalawigan, Batangas State University at pamahalaaang lungsod ng Batangas.

• < Prev
• Next >