Senior citizens sa lungsod, makakatanggap na ng COVID-19 vaccines

Details

Friday, 21 May 2021 - 4:30:11 PM

Nakatakdang simulan ang roll-out ng COVID-19 vaccines para sa mga senior citizens ng lungsod o yaong mga nasa A2 priority group bukas, ika-22 ng Mayo, sa Batangas City Convention Center ayon kay Batangas City Health Officer Dr. Rosanna Barrion. Mauunang bakunahan ang mga senior citizens mula sa mga barangay na may pinakamaraming kaso ng COVID-19 na naitala hanggang May 19.

Ayon kay Barrion, halos kumpleto na ang pagbabakuna ng 2nd dose ng sinovac vaccines sa mga health professionals na nasa A1 group. Ibibigay na rin bukas ang Astra Zeneca vaccine sa mga frontliners ng A1 group na pumili ng naturang brand. Ang mga bakuna ay mula sa donation galing sa COVAX Facility sa ibang bansa at ipinamamahagi sa iba’t ibang rehiyon sa Pilipinas.

Maaaring sa 3rd at 4th quarter pa ng taon inaasahang darating ang mga vaccines na binibili ng pamahalaang lungsod ng Batangas. Matatandaang naglaan si Mayor Beverley Dimacuha ng P200 milyon para sa procurement ng COVID-19 vaccines. Samantala, sinagot ni Barrion ang hinaing ng ilang mga netizens hinggil sa tila mabagal na pagdating ng mga COVID-19 vaccines sa lungsod. Binigyang diin niya na hindi kasama ang Batangas Province sa NCR plus kaya hindi priority ang lalawigan.

“Hindi pwedeng ikumpara ang Batangas City sa ibang LGU dahil malaki ang ating populasyon kung kayat mas malaki ang pangangailangan ng lungsod. Hindi din maaaring ikumpara ang lungsod sa ibang bayan at munisipyo sa lalawigan dahil maliit lamang ang kanilang eligible population ng priority groups. Binigyan tayo ng initial delivery subalit sa bilang ng ating mga katatandaan na nais magpabakuna ay kulang na kulang ito.

Gusto naming mabigyan ng bakuna ang lahat ng priority groups pero sadyang kulang ang ibinibigay na vaccines sa atin at ito ay pinararating namin sa kinauukulan para matugunan ang ating pangangailangan, hinihingi po namin ang pang-unawa ng bawat isa”, paliwanag ni Dra Barrion. (PIO Batangas City)

• < Prev
• Next >