Muling magsasagawa ng Population Census (POPCEN) at Community-Based Monitoring System (CBMS) ang Philippine Statistics Authority (PSA) at ang pamahalaang lungsod sa pamamagitan ng City Planning and Development Office (CPDO) sa lahat ng kabahayan sa Batangas City simula July 15.
Ito ay ang organisadong pagkalap at pangngolekta ng mga de-kalidad, makatotohanan at napapanahong datos na siyang magiging basehan sa pagbabalangkas at pagpaplano ng mga programa at proyekto ng pamahalaang lokal para sa mga mamamayan.

Kabilang sa mga kinakailangang data ang antas ng edukasyon, kalusugan, hanapbuhay, o demographic at socio-economic status ng isang kabayahan.
Gayundin ang bilang ng mga gusali, housing units, households at institutional living quarters at ang data ukol sa demographic characteristics ng institutional population.

Ang lahat ng makakalap na data ay “confidential” at gagamitin lamang sa naturang layunin.
Nakipag-ugnayan ang PSA sa Public Employment Service Office (PESO) ng lungsod upang makahikayat ng mga aplikante na magsisilbing mga enumerators.
Ang bawat isang enumerator ay tatanggap ng halagang P504.00 at P80.00 transportation allowance sa kada araw.
Ang mga ito ay gagamit ng tablet sa pagsasagawa ng census na naka -disenyo para lamang dito.

Kaugnay nito, nakatakdang sumailalim sa pagsasanay ang mga enumerators sa July 8-13.
Isasagawa ang POPCEN at CBMS sa loob ng 55 araw at inaasahang matatapos sa Setyembre 15.
Nagkaroon ng pagpupulong ang mga kinatawan ng PSA at City CBMS Coordination Board noong June 25 hinggil sa mga paghahandang gagawin upang masiguro ang tagumpay ng nasabing gawain.
Hiniling ni Mayor Beverley Dimacuha na mapalawig ang information dissemination campaign ukol dito para mahikayat ang kooperasyon ng mga taga lungsod sa naturang census. (PIO Batangas City)