Bats. City Police nominado bilang Best Component Police Station

Details

Thursday, 20 July 2017 - 4:07:35 PM

Isa ang Batangas City Police Station sa tatlong nominado bilang Best Component Police Station sa buong bansa dahil sa maayos na pamamahala ng tanggapan at mahusay na pagtupad sa tungkulin ng mga tauhan nito.

Kamakailan ay bumisita sa Batangas City Police Station ang mga miyembro ng field evaluation team sa pangunguna ni PCSupt Elmer Escosia kung saan tiningnan at ni-review nila ang mga records at dokumento ng bawat seksyon ng police station.

Nagsagawa rin ang evaluation team ng random interview sa mga police personnel upang alamin ang kanilang kahandaan at kaalaman sa kanilang tungkulin. Ininspeksyon din nila ang kalinisan ng istasyon ng pulis.

Ipinaalam naman ni Batangas City PNP Chief, PSupt. Norberto Delmas ang mga best practices ng police station, partikular ang epektibong implementasyon ng Peace and Order Agenda for Transformation and upholding the Rule of Law o P.A.T.R.O.L 2030 na kabuuan ng mga programa ng kapulisan para sa pangangalaga ng katahimikan at kaayusan ng komunidad.

Ang Search for Best Component City Police Station in the Philippines ay inilunsad ng Philippine National Police para mahikayat at kilalanin ang katangi-tanging performance ng kapulisan at epektibong pagpapatupad ng mga programa nito.

Nauna rito ay binisita rin ang Batangas City Police Station ng evaluation team para sa Search for Best City Police Strategy Management Unit (BCPRMU) kung saan malaking konstribusyon ang magandang performance at maayos na filing ng mga records at dokumento ng istasyon para kilalanin ang PNP Region IV bilang isa sa tatlong Best Police Strategy Management Unit.

Nakatakdang isagawa sa Agosto ang awarding ceremony para sa mga naturang kumpetisyon kasabay ng pagdiriwang ng ika-116 anibersaryo ng Police Service. (PIO Batangas City)

• < Prev
• Next >