Mga magsasaka binigyan ng mga libreng makinarya at kagamitan

Details

Friday, 04 August 2017 - 11:29:40 AM

Malaking suporta sa pagpapalago ng agrikultura ng lungsod ang mga bagong makinarya at kagamitan na libreng ipinamigay ng pamahalaang lungsosd at ng Department of Agriculture(DA) sa ilang mga magsasaka upang mapalaki ang kanilang produksyon at kabuhayan.

Pinangunahan nina Congressman Marvey Mariño at Mayor Beverley Dimacuha ang turn over ceremony ng mga gamit sa pagsasakang ito noong ika-4 ng Agosto sa Office of the City Veterinary and Agricultural Services (OCVAS).

Sa pamamagitan ng pakikipag-ugnayan ni Congressman Marino, pinagkalooban ng DA ng corn planter at four-wheeled drive farm tractor ang mga corn growers. Ito ay malaking tulong sa Yellow Corn Self Sufficiency Program ng OCVAS.

Ang limang multi-purpose shredders ay ipinagkaloob sa mga magsasaka ng San Jose Sico, San Pedro at Tabangao Dao. Pinagkaloaoban din nito ang Bolbok Elementary School at ang Lingap Pangarap ng mga Paslit Center Inc (LPPCI) na nagsasagawa ng backyard gardening.

Ayon kay Flora Andal, assistant city agriculturist, gagamitin ang multi-purpose shredder sa vermicomposting upang mapalago ang organic farming na isinusulong ng OCVAS. “Kung talagang gagawing sustainable ang organic farming, dapat matuto ang mga farmers ng vermicomposting at hindi yung hihingi na lang ng organic fertilizer sa OCVAS. Yakapin sana nila at pangalagaan ang mga ibinigay na makinarya at equipment na ito,” dagdag pa ni Andal. 

Ang mga Rural Improvement Club(RIC) members naman ay binigyan ng vacuum sealer at coffee grinder upang gamitin sa kanilang negosyo.

Isinagawa din ang blessing ng farm workshop at machinery shed na magsisilbing stockroom ng mga kagamitan ng OCVAS. (PIO Batangas City)

• < Prev
• Next >