Batangas City PNP, nanguna sa lalawigan sa kampanya laban sa droga

Details

Monday, 07 August 2017 - 2:07:32 PM

Tinanghal na Top 1 Performing Police Station (City Police Station Category) ang Batangas City PNP sa Campaign Plan Double Barrel para sa 2nd Quarter CY 2017 kaugnay ng Illegal Drug Campaign Project Double Barrel-Reloaded ng Philippine National Police (PNP).

Ang plaque of recognition ay ipinagkaloob ni Pol. Senior Supt. at Acting Provincial Director Randy Peralta noong ika-24 ng Hulyo sa Batangas Police Provincial Office (BPPO) sa Camp Miguel Malvar.

Lubos ang kasiyahan at pasasalamat ni Batangas City PNP Chief Police Supt. Norberto Delmas sa kanyang mga tauhan sa sipag at gilas na ipinamalas ng mga ito sa pagtupad sa kanilang tungkulin kahit aniya sa maikling panahon pa lamang ng kanyang panunungkulan sa lungsod.

“Ang human resource ang edge namin sa ibang station sapagkat kahit kulang ang manpower dito, lahat naman ay nagtatrabaho,” sabi ni Delmas.

Patuloy din aniya ang kanilang mga isinasagawang capability-enhancement training upang mapag-ibayo ang kakayahan ng kanilang mga tauhan sa pagpapatupad ng batas.

Hiningi niya ang patuloy na suporta ng publiko laban sa illegal na droga at sinabing gagawin niya ang lahat upang hindi mabigo ang kanyang magandang hangarin para sa katahimikan ng lungsod gayundin ang kaligtasan ng mga mamamayan nito.

Ang double barrel alpha program ay mas malawak na operasyon laban sa droga kung saan binibisita ang mga barangay, malls, kulungan, paaralan at iba pang lugar kung saan maraming tao.

Ito aniya ay binubuo ng upper barrel na kinabibilangan ng mga national operating support units tulad ng PDEA at NBI na lumalaban sa malalaking sindikato at pumupuksa sa mga drug laboratories at mga international drug syndicate habang ang lower barrel naman ay kinabibilangan ng oplan tokhang at taphang para sa mga street level.

Ito ay sinimulan noong July 1, 2016 at mas lalo pang pinaigting sa kasalukuyan ng administrasyong Duterte. Ang certificate ay iniabot ni City Administrator Narciso Macarandang kay Pol Supt. Delmas bilang kinatawan ni Mayor Beverley Dimacuha (PIO Batangas City)

• < Prev
• Next >