CSWDO may programa para sa mga street children

Details

Tuesday, 15 August 2017 - 11:40:20 AM

Tuloy tuloy ang City Social Welfare and Development Office (CSWDO) sa implementasyon ng Sagip Kalinga sa mga Bata Program na tumutulong sa mga bata upang maiangat ang kanilang buhay, gumagabay at nagbibigay proteksyon sa kanila laban sa panganib ng lipunan at pang-aabuso. Kabilang sa sektor na kinakalinga ng programa ay ang mga mga batang nasa panganib at mahihina (child most at risk and vulnerable); rugby boys; street children; child laborer; nangangalkal ng basura at mga nanlilimos na mga Bajau.

May regular monitoring at surveillance ang CSWDO katulong ang kapulisan at mga community peace volunteer groups sa mga batang ito. Ang mga nakikitang gumagala sa kalye sa delikadong oras ay pansamantalang kinakalinga sa kanilang tanggapan at ibinabalik sa kanilang pamilya at komunidad matapos sumailalim sa medical check-up, counseling service, family case management at iba pa upang maturuan ng tamang pag-uugali at maging kapaki pakinabang na indibidwal. May ugnayan rin ang CSWDO at barangay oficials para sa tamang pagbabalik ng mga bata sa kanilang pamilya.

Kung hindi naman residente ng lungsod ang mga magulang ng bata, nakikipag ugnayan ang CSWDO sa lokal na tanggapan ng social welfare sa kanilang bayan.

Simula 2015, nagpatupad ang CSWDO ng mga livelihood projects para sa pamilya ng mga batang nailigtas sa kalye. Kabilang dito ay ang pagkakaloob ng eco-bike para sa 10 pamilya na ngayon ay ginagamit sa pagtitinda.

Binibigyan din ng CSWDO ng educational assistance ang mga kabataang nasa child placement agency at home temporary shelter habang sumasailalim sila sa psycho- social services kagaya ng capability- building seminar, therapeutic activities, educational tour at iba pa upang matulungan silang magbago para maibalik sa kanilang pamilya at maging responsableng mamamayan ng komunidad. (PIO Batangas City)

• < Prev
• Next >