Bawal ng magpaputok sa harap ng bahay

Details

Monday, 11 December 2017 - 5:22:00 PM

BATANGAS City- Mahigpit  na ipagbabawal ngayon ang pagpapaputok sa harap ng bahay sa pagdating ng Bagong Taon alinsunod sa Executive Order No. 28 ni Pangulong Rodrigo Duterte.

Ito ang ipinahayag ni Batangas City Police Superintendent Wildemar Tan Tiu sa 3rd  Fireworks and Pyrotechnics Regulatory Offices and Vendors Meeting nitong December 11 sa pangunguna ng Batangas City Police Station.

Sa ilalim ng Implementing Rules and Regulations  ng Executive Order 28, pwede lamang magpaputok  sa mga lugar na itinalaga ng local na pamahalaan o ng barangay  kung saan ito ay dapat malayo sa mga kabahayan.  Pwede naman  sa harap ng bahay ang mga fireworks display kagaya ng lusis,  fountain at iba pa.

Upang makapagtinda naman ng mga  fireworks display,  kailangang kumuha muna ng Mayor’s permit kung saan dapat may indorsement ng  hepe ng pulis at pagkatapos ay permit sa Camp Crame.   Kapag may ilegal namang magbenta ng paputok sa mga menor de edad, aalamin kung sino ang nagbenta at siyang papatawan ng kaukulang kaparusahan.  Mahalaga din ang distansiya ng mga tindahan sa mga bodega upang maiwasan ang pagkakadamay ng ibang pasilidad kung sakaling may pumutok at magkasunog. Tinalakay din ang safety measures na kanilang patatatagin.

Nagpahayag naman ng pakikiisa ang mga verndors sa ipinatutupad ng batas na ito. Sa ngayon ay wala pang lugar na itinalaga ang pamahalaang lungsod kung saan pwedeng magbenta ng mga fireworks display at paputok.

Sinabi ni Tiu na “lahat po ay dapat magtulong-tulong dahil gusto natin masaya, maligaya, at ligtas ang bawat isang Pilipino sa pagsalubong ng Bagong Taon.”  Nais din nilang mapalawak ang public awareness sa mga rules at regulations tungkol sa manufacture, sale at paggamit ng fireworks.

Payo ng mga awtoridad na gumamit na lang ng torotot, musika, kaldero at iba pang gamit sa bahay na pampaingay. Bukod sa menos gastos, ligtas din itong paraan ng pagsalubong sa Bagong Taon.

Ang sinumang lalabag ay papatawan ng parusang   pagkakulong ng anim na buwan hanggang isang taon,  multang  P20,000  o hindi  lalampas sa  P30,000.

• < Prev
• Next >