TB mass screening prayoridad ang matatanda at may diabetes

Details

Wednesday, 13 June 2018 - 4:54:13 PM

BATANGAS CITY- Nagsagawa ang City Health Office (CHO) ngayong Miyerkoles ng tuberculosis mass screening sa may 200 senior citizens at may sakit na diabetes mellitus na siyang prayoridad sa paggamot ng sakit na ito.

Ayon kay City Health Officer Rosanna Barrion, ang mga matatanda at diabetic ang mga vulnerable o madaling kapitan ng tuberculosis kayat ang mga ito ang tinarget nila para sa TB mass screening.

May nakuha silang 900 na TB cases noong 2017 at patuloy nila itong ginagamot ng libre haggang anim na buwan sa ilalim ng kanilang Tuberculosis Control and Prevention Program.

Sinabi ni Dr. Barrion na hindi dapat itago o ikahiya ang nakakamatay at nakakahawang sakit na ito sapagkat madali itong gamutin. Ang CHO personnel ay tutok ang gamutan sa mga identified cases at tinutulungan ng Department of Health (DOH) na nagbibigay ng gamot sa mga local government units. Upang maiwasan ang tuberculosis, payo ni Dr. Barrion na kumain ng masusustansiyang pagkain, magehersisyo, magkaroon ng sapat na tulog at disiplina sa sarili upang makaiwas sa mga bisyo at magkaroon ng healthy lifestyle.

Target aniya ng DOH na mapalawak pa ang paghahanap ng mga taong may tuberculosis upang magamot ito at tuluyan ng maging TB-free ang bansa.

Isa sa mga pasyente si Lorna Paala ng Maalbo De la Paz, 31, at may pitong anak. Aniya, karaniwang pananakit ng likod, pag uubo at sakit ng ulo ang kanyang nararamdaman kaya binalewala nya ito. Subalit habang tumatagal ay tumitindi ang kanyang pag ubo, nagkakaroon ng lagnat at nakakaramdam ng panghinhina kayat agad siya nag punta sa CHO upang mag pa konsulta at dito siya na diagnosed na may tuberculosis. Tatlong buwan na siyang ginagamot at bumubuti na ang kalagayan.

Katuwang ng CHO sa TB mass screening na ito ang DOH, Provincial Health Office at Philippine Business Social Progress na siyang may dala ng RAD Tech Van kung saan isinagawa ang X-ray ng mga pasyente. (PIO Batangas City)

• < Prev
• Next >