Buong Team EBD panalo

Details

Friday, 17 May 2019 - 3:59:00 PM

Nakuha ng Team EBD ang boto ng mga taga Batangas City sa ginanap na midterm elections noong May 13.
Noong gabi ng eleksyon, iprinoklama sina reelected Mayor Beverley Dimacuha at Vice Mayor June Berberabe na parehong tumakbo ng walang kalaban. Sa 223, 228 registered voters sa lungsod, nakakuha ng 136,055 votes si Dimacuha habang nakakuha naman si Berberabe ng 134,529 votes.

Iprinoklama ngayong May 17 ang mga city councilors-elect sa Sangguniang Panlungsod Session Hall.
Sila ay sina Atty. Alyssa Cruz na number one councilor, Aileen Grace Montalbo, Nestor Dimacuha, Karlos Emmanjuel Buted, Gerardo de la Roca, Oliver Macatangay, Nelson Chavez, Julian Villena at mga bagong konsehal na sina Julian Pedro Pastor, Isidra Atienza, Maria Aleth Lazarte at Lorenzo Jr. Gamboa.

Ang proclamation ay ginampanan nina Batangas City Acting Comelec Officer Atty. Gretchen Dolatre kasama sina City Prosecutor Bien Patulay at si Dr. Victoria Fababier, chief, Schools Governance and Operations Division, Schools Division of Batangas City bilang Board of Canvassers sa Session Hall ng Sangguniang Panglungsod.

Ngayong araw ding ito ang ang proclamation ni reelected Congressman Marvey Marino ng 5th District of Batangas sa Session Hall ng Sangguniang Panlalawigan . Siya ay wala ding katunggali at nagkamit ng 132, 286 na boto.

Kaalinsabay nito ay ang proklamasyon ng reelected Board members na sina Claudette Ambida at Arthur Blanco.

Ayon kay Dolatre, nagkaroon ng delay sa bilangan sa Batangas City dahil sa defective na secure digital (SD) cards sa apat na barangay kung kayat nagpareconfigure pa sila. Ito ay nangyari sa barangay Dumantay, Haligue Silangan, Talahib Payapa, Pinamucan Proper at Gulod Itaas. Wala pa rin silang maibigay na turnout ng voters o kabuuang bilang ng mga bumoto habang sinusulat ang balitang ito.

Nagpaabot ng pasasalamat si Dolatre sa lahat ng mga ahensya na tumulong upang magkaroon ng maayos at mapayapang eleksyon sa lungsod at pinaalalahanan ang mga kumandidato na magsumite ng kanilang Statement of Contributions and Expenditures (SOCE) hanggang ika-12 ng Hunyo.

Ayon kay Batangas City PNP Chief Sancho Celedio, naging maayos at tahimik ang naging eleksyon sa lungsod dahilan sa maagang deployment ng kanilang mga tauhan sa polling centers at “some of our leaders ran unopposed.”
(PIO Batangas City)

• < Prev
• Next >