98. 2% ng households sa Batangas City may sanitary toilets

Details

Tuesday, 24 September 2019 - 9:37:00 AM

Sa harap ng direktiba ng Department of Health (DOH) sa mga local government units na palakasin ang pagpapatupad ng zero open defecation (ZOD) bilang isa sa mga hakbang upang maiwasan ang sakit na polio na muling bumalik sa bansa pagkatapos ng halos dalawang dekada ng pagiging polio-free, ipinabatid ng Sanitation Division ng City Health Office (CHO)na 67,181 households ng kabuuang households na 68,414 o 98.2% sa Batangas City ang may sanitary toilets noong 2018.

Ayon kay Engr. Elisha Dimayuga, isang sanitary at environmental engineer ng CHO, ang ilang mga pamilya sa coastal barangay ng Sta. Clara at Cuta at sa Mabacong ay may communal toilets o shared toilets sa mga kamag-anak . Sinabi rin niya na bagamat may mga communal toilets sa mga barangay na ito, may nakikita rin silang dumi ng tao na tinatabunan ng buhangin.

Ang Badjao community sa brgy. Wawa aniya ay may dalawang communal toilets.

Sinabi rin ni Engr. Dimayuga na ang ipinatutupad ngayon ng DOH ay ang pagkakaroon ng access sa sanitation services kagaya ng basic sanitation facility na water- sealed toilet o may septic tank; safely managed sanitation service o hindi shared o communal toilets kundi isang toilet para sa isang household; at certification of barangay as zero open defecation area.

Hindi pa aniya naipatutupad sa Batangas Province ang certification of barangay as zero open defecation area.

Ayon sa DOH, isang dahilan ng polio ay ang unsanitary practice ng pagdumi ng tao. Mahalaga ang wasto at regular na paglilinis ng kamay ng sabon at tubig, paggamit ng toilet, kumain ng fully cooked na pagkain at dapat uminom ng malinis na tubig . Kinakailangan din ng full vaccination ng mga batang mababa sa limang taon ang edad laban sa sakit na ito.

• < Prev
• Next >