BC Police palalakasin ang anti-illegal drug education campaign sa mga paaralan

Details

Monday, 03 February 2020 - 10:45:00 AM

Muling isasagawa ng Batangas City Police Station ang Drug Abuse Resistance Education o D.A.R. E sa lungsod upang palakasin ang information campaign laban sa iligal na droga. Target ng D.A.R.E program na mabigyan ng sapat na kaalaman ang mga kabataan para makaiwas sa ipinagbabawal na gamot at sa halip ay maging mabuting mamamayan ng komunidad

Kaugnay nito, nagkaroon ng opening ceremony at signing ng Memorandum Of Agreement (MOA), February 3 sa Sta. Clara Elementary School kung saan idadaos ang 10-module sessions para sa mga mag-aaral sa grade 6. Ito ay isasagawa tuwing Martes at Huwebes simula February 4.

Lumagda sa nasabing MOA sina Batangas City PNP Chief, PLTCol Julius Añonuevo, Department of interior and Local Government (DILG) City Director Esther Dator, Philippine Drug Enforcement Agency (PDEA) Agent 1 Candelaria Campañera, Association of Barangay Chairmen (ABC) President Angelito Dimacuha, brgy. Gulod Labac Chairwoman Digna Fajarito, brgy. Sta. Clara Chairman Derick Arago, Principal ng Sta. Clara Elementary School, Dr. Aurea Ocon, at Mayor Beverley Dimacuha na kinatawan ng kanyang Executive Assistant (EA), Serge Atienza.

Ayon kay PLTCol Añonuevo naniniwala pa rin siya na ang “kabataan ang pag-asa ng bayan” kung kaya’t dapat mai-iwas ang mga ito sa mga maling gawain. “Dito ay ipapakita namin sa inyo kung ano ang itsura ng ipinagbabawal na droga at tuturuan naming kayo na umiwas dito para maisiguro ang inyong magandang kinabukasan,” pagdidiin ni PTCol Añonuevo.

Sinabi naman ni Atienza na maraming programa ang pamahalaang lungsod para mahubog ang mga kabataan sa mabuting asal. “Naniniwala si Mayor Dimacuha at pamahalaang lungsod sa kakayanan ng bawat isang bata dito at nakikita niya ang pagpupursige ninyo na maging disiplinadong mamamayan ng lungsod,” sabi ni Atienza (PIO-Batangas City)

• < Prev
• Next >