Batangas City Jail, nananatiling COVID19-free facility

Details

Monday, 14 June 2021 - 3:55:47 PM

Nananatiling COVID-free ang San Jose Sico Jail sa lungsod ng Batangas. Ito ayon sa panayam ng programang PIO, ang lingkod nyo! kay BJMP SJInsp Glenn Sianquita ngayong araw.

Binigyang diin niya na ito ay dahil sa wala pa ding visiting privileges ang mga inmates simula pa noong ipatupad ang Enhanced Community Quarantine hanggang ngayong General Community Quarantine (GCQ). Layunin nito na masiguro na hindi makakapagdala ng virus ang mga bisita. Maging mga BJMP personnel ay limitado din ang paglabas at kailangang may negative swab test bago muling makabalik sa nasabing pasilidad.

Sa pamamagitan ng video call at telephone calls nakakausap ng mga persons deprived of liberty (PDL) ang kanilang mga mahal sa buhay habang sa pamamagitan naman ng video conference isinasagawa ang mga court hearings. Virtual din ang counselling at pagdalo nila ng misa tuwing Linggo upang matugunan ang aspetong isipiritwal ng mga ito.

May 45 inmates ang sumasailalim sa Alternative Learning System o ALS na isinasagawa sa pamamagitan ng modular distance learning. Lubos ang pasasalamat ni Warden sa suporta ng pamahalaang lungsod sa pamumuno ni Mayor Beverley Rose Dimacuha na patuloy aniya na tumutulong upang maging komportable ang kalagayan ng mga inmates at upang magkaroon sila ng sapat na suplay. Sa kasalukuyan ay may 334 male at 75 na female na PDL dito. (PIO Batangas City) 

pic cto_BJMP-Batangas City Jail, Bjmp Batanga CJ FD

• < Prev
• Next >