Mabuting kaugalian ng mga Batangenyo, ipinaala-ala ni Mayor Dimacuha

Details

Saturday, 28 August 2021 - 4:57:23 PM

Naging emosyonal si Mayor Beverley Dimacuha nang manawagan sa mga mamamayan ng lungsod na huwag kalimutan ang magagandang kaugaliang ipinamana ng ating mga magulang sa kabila ng malaking pagbabago at kaunlaran ng lungsod ng Batangas. Ito ang kaniyang pahayag sa isinagawang virtual Full Development Council Meeting ng Batangas City Development Council (BCDC) kamakailan kung saan siya ang tumatayong chairman.

Ayon kay Mayor, layunin ng nasabing pagpupulong na planuhin at ilagay sa maayos na perspective ang kinabukasan ng Batangas City kaalinsabay ng pagkakaroon ng malayang pagpapahayag sa mga nakikita at naririnig sa kapaligiran. “Likas sa mga Batangenyo ang pagiging matapang at higit na lumalakas sa kabila ng mga adversities na ating nararanasan. Sana, kasabay ng mga ginagawang pagpapaganda ng lungsod, pagandahin din natin ang character ng bawat isa,” dagdag pa ni Mayor.

Binanggit na halimbawa ni Mayor Dimacuha ang kaniyang mga nababasa sa social media kung saan laganap ang negativity lalo’t higit ang bashing hindi lamang sa gobyerno kundi maging sa personal na buhay ng isang tao. “ Malaking challenge sa ating lahat ang pandemyang ito pero hindi ito lisensya para maging masama tayo sa ating kapwa. Kapag nalampasan natin ito, we should be better and united as a nation,” payo ni Dimacuha.

Hiniling ni Dimacuha sa mga opisyales ng lungsod at ng mga barangay na dumalo sa nabanggit na pagpupulong na payuhan at akayin ang mga kabataan at maging mabuting halimbawa. “Sa mga kasama ko sa serbisyo publiko, sama-sama nating dalhin sa magandang direksyon ang lungsod. Paalalahanan ang ating mga kabataan na huwag makalimot sa mga pinamanang kaugalian ng ating mga magulang. Huwag nawa sana silang mahirati sa mga gawain na balang araw ay magdudulot ng pagkakawatak-watak sa ating mga nasimulan,” pagbibigay-diin ni Mayor. (PIO Batangas City)

• < Prev
• Next >