San Jose Sico inmates nagtapos sa ALS

Details

Friday, 25 May 2018 - 5:56:48 PM

BATANGAS CITY- May 18 inmates ng San Jose Sico Jail ang nagtapos sa Alternative Learning System (ALS) graduation ceremony na idinaos dito ngayong May 25.

Ang kabuuang bilang ng mga nagtapos ay 29 na lalaki at 11 babae para sa K-12 taon 2016 kung saan ang ibang inmates ay nakalaya na kung kayat hindi na nakadalo sa graduation ceremony ang mga ito.

Isa sa mga nagtapos ay si May Dote, 24, dalaga, ng barangay San Isidro. Mahigit na dalawang taon na siyang nakakulong sa kasong droga. Malaking tulong aniya sa kanya ang pag pasok sa ALS. “Hindi na po ako nakapag patuloy ng pag-aaral ng high school dahil sa aking pagkakulong kung kayat nung nagkaroon po ng programa ang BJMP para sa mga di nakapag aral ay agad po ako nag enrol at eto nga po natapos ko ang junior high school,” sabi ni Dote.

Sinabi naman ni Mario Castillo Jr, nahirang na Natatanging ALS Learner, na “malaking pag babago ang dulot nito sa aking buhay. “Nasa loob o nasa labas man, walang makakahadlang sa pagkamit ng ating tagumpay at ito ang magiging sandata natin sa tunay na laban upang mapalago ang ating sarili at ito ang ating gagamitin tungo sa pagbabago ng ating buhay,” sabi ni Castillo.

Ayon kay ALS Education Program Supervisor Nestor Alon, patuloy nilang hinihikayat ang mga inmates na natigil sa pag-aaral na mag enrol at ipag patuloy ang kanilang pag-aaral ng sa ganun ay makamit nila ang kanilang pangarap na makapag tapos.

Sinabi naman ni Warden J/Supt. Lorenzo Reyes na naisakatuparan ang ALS sa loob ng kulungan sa pamamagitan ng pagtutulungan ng city government, Department of Education, Batangas City Division, at ng Bureau of Jail Management and Penology. Ito ang aniya ang unang Moving Up Ceremony para sa Junior High School na may temang “Mag-aaral K-12 Handa sa Hamon ng Buhay”sa ilalim ng kaniyang panunungkulan. (PIO Batangas City)

• < Prev
• Next >