Bagong Police chief tutugunan ang mataas na kaso ng vehicular accidents

Details

Monday, 25 November 2019 - 4:55:00 PM

Sinabi ng bagong Batangas City Police Chief na si Lt. Co. Julius Anonuevo na una niyang aayusiin ang mataas na insidente ng vehicular accidents sa lungsod bunsod ng kakulangan ng disiplina.

Naging panauhin si Anonuevo sa regular session ng Sanguniang Panlungsod, Nov, 25, upang pormal na ipakilala ang sarili bilang bagong talagang hepe ng City PNP.

Sa kaniyang talumpati ay binanggit niya ang kaniyang mga naobserbahan sa lungsod at ang mga nais niyang gawin para lalo itong mapaunlad pagdating sa seguridad at kapayapaan.

Ayon kay Chief Anonuevo, “Mababait ang mga pulis dito. Mababait ang mga taga Batangas. In my two- week stay here, lumabas na ako ng gabi at madaling-araw. Tahimik po. Tahimik ang Batangas City.”

Sinabi rin niya na tututukan niya ang pabibigay ng edukasyon sa mga drayber lalo sa mga nagmomotor. Pagbubutihin din niya ang pagpapaigting ng disiplina sa kapulisan alinsunod sa programa ni Regional Director Vicente Danao Jr., kung saan ang serbisyo ng mga pulis ay inaasahang makikita at mararamdaman ng mga tao.

“Rest assured that all the undertakings you are doing now will be supported by the Philippine National Police, particularly Batangas City Police Station under my leadership,” dagdag pa ni Anonuevo.

Naglahad din ang ilang mga konsehal ng iba pang mga problema na pwedeng pagtuunan ng pansin ni Anonuevo gaya na lamang ng illegal gambling, traffic, motorcycle accidents, rugby boys at pagdayo ng mga cultural minorities.

“Asahan ninyo po na lahat ng inyong sinabi ay pipilitin kong solusyunan,” sabi ni Anonuevo. (Beverly Prescious Javier/ PIO Batangas City Immersion student)

• < Prev
• Next >