Sen. Villar nagdala ng medical at feeding mission, livelihood sa Taal evacuees

Details

Tuesday, 11 February 2020 - 3:50:00 PM

BATANGAS CITY- Bumisita sa Sports Complex sa Bolbok, Batangas City si Sen. Cynthia Villar dala ang medical mission at feeding outreach para sa mga natitirang Taal evacuees dito, February 11.

Siya ay sinalubong nina Cong. Marvey Mariño at Mayor Beverley Rose Dimacuha at Gov. Hermilando Mandanas.

Ayon kay Villar, nakapagpaabot na siya ng tulong sa Taal victims na nasa evacuation centers sa ibat-ibang bayan at lungsod. “Bumalik ako sa Batangas dahil may kaibigan ako na may ari ng isang pharmaceutical company, taga San Juan Manila, na wiling mag handog ng tulong sa mga nangangailangan sa pamamagitan ng dental at medical mission. Sila rin ang nag dala ng mga gamot na ipamimigay ng libre sa mga kapos palad.,” sabi niya.

May mga kasama din siyang duktor mula sa Las Pinas General Hospital para manggamot at mag checkup sa mga may karamdaman. Naghanda naman ang kanilang foundation ng feeding mission para sa mga bata. “Sa pamamagitan ng ganitong gawain naway nakatulong kami para maibsan ang problema ang mga naapektuhan ng pag sabog ng bulkang Taal.” dagdag pa ni Villar.

Kung kailangan aniya ng livelihood sa relocation area ay handa silang tumulong at mag padala ng mga magtuturo ng kabuhayan partikular ang kanyang Committee on Agriculture and Food na pwedeng magturo ng aqua culture sa mga mangingisda.

Ang kanyang Villar Sipag Farm ay nagkakaloob ng training sa mga trainors upang magturo ng kanilang natutunan sa kanilang lugar. Pwede silang mag-aral ng agri crops, native animal farming, aqua culture, farm business school, cacao planting under the coconut tree, rice farming with mechanization at inbred rice seed production. Mayroon ding blanket weaving, paggawa ng bags at handicraft gamit ang water lilies.

Sinabi rin ni Villar na mayroon silang mobile construction school kung saan pwedeng mag-aral ang lalaki sa mason at ang babae naman ay sa painting. Pwede silang magtrabaho sa kanilang construction sites at ang starting pay ay P600 bawat araw. Mayroon silang dormitory kung saan pwedeng tumigil sa buong linggo ang worker at pwedeng umuwi kung weekend. (PIO Batangas City)

• < Prev
• Next >