Batangas City tinanggap ang share nito bilang host ng power plants

Details

Wednesday, 12 February 2020 - 4:02:00 PM

May P31.9 milyon ang kabuuang halagang ipinagkaloob ng First Gen Power Corporation sa pamahalaang lungsod ng Batangas bilang kabahagi ng lungsod sa kita ng limang power plants ng kompanya bilang host ng mga ito.

Ang ceremonial turnover ng ER 1-94 funds ay isinagawa sa tanggapan ng Punonglungsod kung saan iniabot ni Mr Ramon Araneta, VP ng First Gen Power Corporation ang mga tseke kay Mayor Beverley Rose Dimacuha kasama sina OIC City Treasurer Aster Marasigan at City Planning and Development Coordinator Sonny Godoy.

Ito ay alinsunod sa provision ng Energy Regulation (ER) 1-94 ng Department of Energy (DOE) kung saan ang share ng isang host local government unit (LGU) ay one centavo per kilowatt hour ng electricity sales ng isang power plant.

Sa ilalim ng First Gen Power Corporation, nag ooperate ang limang power plants nito-ang 1000MW Sta Rita Power Plant, 500 MW San Lorenzo Power Plant, 450 MW San Gabriel Power Plant sa barangay Sta Rita Aplaya/Karsada at ang 97MW Avion Power Plant sa barangay Bolbok.

Isinasaad ng ER 1-94 na sa isang sentimo ng electricity sales ng power plant sa mga power utilities, 50% ay pupunta sa Electrification Fund (EF); 25 % ay para sa Development and Livelihood Fund (DLF) at ang natitirang 25% ay para sa Reforestation, Watershed Management, Health and/or Environment Enhancement Fund (RWMHEEF).

Nagsumite na ang pamahalaang lungsod ng annual work program o listahan ng mga proyekto na paggagamitan ng pondong nabanggit. Ang pera ay ididiretso ng mga power plants sa Trust Fund Account ng lungsod na specifically para sa ER 1-94 DOE projects na alinsunod sa mga patakaran ng Electric Power Industry Reform Act of 2001 at Department Circular No. DC 2018-08-0021 ng Department of Energy.

Mayroon ding katulad na share na nakukuha ang host barangays at ang pamahalaang panlalawigan.

Noong nakaraang lingo, ipinagkaloob ang halagang P 5.7 milyon sa barangay Sta Rita Karsada, P 13.3 milyon sa barangay Sta Rita Aplaya at P 349,876 naman sa barangay Bolbok. (PIO Batangas City)

• < Prev
• Next >