Kahalagahan ng breastfeeding, tinalakay sa online seminar ng Nutrition Division

Details

Tuesday, 01 September 2020 - 4:03:52 PM

Isang online seminar ang isinagawa ng Nutrition Division ng City Health Office (CHO) na naglalayong mapalakas ang kampanya sa breastfeeding, August 28. Ang nasabing gawain ay bilang paggunita sa National Breastfeeding Awareness Month tuwing buwan ng Agosto.

Ito ay may temang "I-BIDA ang Pagpapasuso Tungo sa Wais at Malusog na Pamayanan! Tinalakay dito ang component ng breast milk, kahalagahan ng breastfeeding at kung ano ang tamang paraan ng pagpapasuso.

Ayon kay Nutrition Officer Eva Mercado, mas mainam na gatas ng ina ang ibigay sa mga sanggol dahil taglay nito ang ang sapat na nutrisyon upang maiwasan ang malnutrisyon. Idinagdag ni City Health Officer Rosana Barrion na ito ang pinakakumpletong pagkain ng isang sanggol sa loob ng anim na buwan mula sa kanyang pagsilang.

Ang gatas ng ina aniya ay siksik sa sustansya at antibodies na panlaban ng sanggol sa sakit. “Sa naranasan nating pandemya ngayon, hindi dapat mag-alala ang mga magulang sapagkat malaki ang maitutulong ng breastmilk upang mapalakas ang resistensiya ng mga sanggol laban sa virus”, ayon kay Barrion.

Binigyang diin naman ni Mayor Beverley Rose Dimacuha sa kanyang mensahe ang “special bond” na mayroon ang ina sa kanyang anak. Patunay aniya dito ang kaso ng isang inang nag positibo sa COVID19 ngunit sa kabila nito ay nagpatuloy sa pagbibigay ng gatas sa kanyang sanggol. Kailangan lamang aniyang sundin ang striktong health protocols tulad ng paggamit ng face mask, pagsanitize ng mga kamay bago at pagkatapos magpasuso.

Wala pa aniyang nakikitang ebidensiya na naipapasa ng ina ang kanyang sakit sa sanggol kung ito ay nagpapasuso.

Samantala, humigit kumulang sa isandaang breastfeeding mothers at mga buntis sa lungsod ang nakilahok sa nabanggit na online seminar. (PIO Batangas City)

• < Prev
• Next >