Dry-run para sa Mt. Banoy tourism project, isinagawa

Details

Wednesday, 06 April 2022 - 4:14:00 PM

Pinangunahan ng Technical Working Committee (TWG) on the Protection and Tourism Development of Mt. Banoy ng pamahalaang lungsod ang dry-run para sa pagbubukas at pagtanggap ng mga turista sa Mt. Banoy noong April 5.

Katuwang ng TWG sa nasabing gawain ang mga opisyales ng barangay, mga kooperatiba at mga residenteng kaisa sa naturang proyekto.
Kabilang naman sa mga naging bisita o turista sa naturang dry-run ay ang mga miyembro ng KALIPI, day care workers, Sangguniang Kabataan officers at ilang empleyado ng pamahalaang lungsod.

Sa isinagawang evaluation, binigyang diin ang safety ng mga turista sa pag-akyat ng bundok lalo na kung masama ang panahon.

Kaugnay nito, magkakaroon ng mas maagang anunsyo at mga paalaala para sa mga turista.
Magtatalaga ng first aid personnel sa bawat shuttle na gagamitin at magkakaroon din ng first aid at information desk sa lowland, midland at upland.

Sasailalim sa higit pang pagsasanay sa tour guiding ang mga tourist guide para maipadama sa mga turista ang mainit na pagtanggap at maging mas kawili-wiling pamamasyal dito.

Bibigyan din sila ng first aid kits.

Upang mapanatili ang kalinisan, ipatutupad ang “basura mo dala mo” kung saan sa registration pa lamang ay bibigyan na ang mga bisita ng lalagyan ng basura.

Hinihikayat rin na magdala ang mga ito ng sariling water tumbler at kailangang ipresenta ang kanilang vaccination card.

Hindi muna itutuloy ang soft opening ng Mt. Banoy sa April 9, dahil sa tinatayang sama ng panahon sa araw na yaon at sa halip ay ipagpapatuloy ang isinasagawang dry-run para sa higit na paghahanda.

Magkakaroon dito ng station of the cross mula Miyekules Santo hanggang Biyernes Santo, kung saan walang papayagang umakyat na sasakyan sa Mt. Banoy sa nabanggit na mga araw. (PIO Batangas City)

• < Prev
• Next >