Training para sa mga myembro ng barangay anti-drug abuse councils isinagawa

Details

Thursday, 28 April 2022 - 5:14:52 PM

Training para sa mga myembro ng barangay anti-drug abuse councils isinagawa Nagsagawa ng rollout Training of Trainers for BADAC Advocacy Committee ang Philippine Drug Enforcement Agency (PDEA) Batangas sa Batangas City Sports Center ngayong araw, April 28.

Ayon kay Pol Lt. Diosdado Pasion II, Chief Police Community Relation ng BCPS, layunin ng nasabing gawain na paigtingin ang barangay drug clearing program ng pamahalaan. Ito ay isang programa ng gobyerno na nagbibigay pag-asa sa mga biktima ng illegal na droga upang makapagbago at makabalik ng normal sa komunidad kasama ang kanilang pamilya.

Sa kasalukuyan, may 19 na barangay na sa lungsod ang drug-cleared. May limang barangay ang nag-aaplay upang mapabilang dito. Kaugnay nito, binigyan sila ng PDEA Batangas ng mahahalagang impormasyon hinggil sa mga hakbang na dapat gawin upang maging drug-cleared.

Ipinabatid ni Plt Col. Salvador Solana, Hepe ng Batangas City Police Station (BCPS) ang drug situation sa lungsod at ang kanilang mga anti-illegal drug accomplishments habang tinalakay naman ng mga kinatawan ng PDEA Batangas ang drug affectation, drug identification at effects of drugs gayundin ang mga guidelines for community involvement in reforming drug offenders upang maging self sufficient at law-abiding members ng lipunan.

Bilang basic unit ng society, hiniling ni DILG City Director Ester Dator sa mga barangay ang suporta at kooperasyon ng mga ito upang mabawasan at masugpo ang problema sa ilegal na droga. Nagbahagi naman si dating Konsehal Armando Lazarte na dumalo bilang kinatawan ni Mayor Beverley Rose Dimacuha ng kanyang mga naging karanasan sa paggamit ng ilegal na droga.

Binigyang diin niya ang masasamang epekto nito at pinayuhan ang lahat na huwag itong subukan. Binangit din niya na bagamat naligaw ng landas, may pag-asang makabangon at magbago ang mga dating “user” nito. Ang nasabing pagsasanay ay dinaluhan ng mga barangay chairperson, secretaries at iba pang opisyales mula sa 105 barangay ng lungsod. (PIO Batangas City)

• < Prev
• Next >