SIMEX on crisis management, matagumpay na naisagawa

Details

Monday, 01 August 2022 - 4:51:54 PM

Naging matagumpay ang Crisis Management Simulation Exercises (SIMEX) na isinagawa ng City Disaster Risk Reduction Management Council (CDRRMC) noong July 29 sa bypass road sa barangay Dumantay. Multiple incidents ang scenario ng SIMEX kung saan kabilang dito ang hijacking, hostage taking, oil leak at car and motorcycle accidents.

May isang nasawi at 14 ang nasugatan sa naturang insidente. Tumayong Incident Commander (IC) si City PNP Chief, PLTCol Salvador Solana, Operations Section Chief si PMAJ Erickson Go at Deputy Commander naman si Fire Marshall CINSP Benjamin Caca. Naging observers sina Office of the Civil Defense (OCD) Region IV-A Director Maria Theresa Escolano, OCD Reg.IV-A Training Officer Randy Dela Paz, Police Community Relations Chief- PLTCol Ruelito Fronda at Provincial DRRM Officer, Joselito Castro.

Pinuri ng mga observers ang suporta at kooperasyon ni Mayor Beverley Dimacuha na nagbigay ng instruction kay IC Solana sa pamamagitan ng pagtawag sa telepono. Maigting ang bilin ni Mayor na tiyakin ang kaligtasan ng lahat maging ng hostage taker. Nakita rin nila ang mabilis na pagbubuo ng Incident Management System (ICS) at ang agarang pagresponde ng lahat ng konsernadong ahensya kabilang ang Barangay DRRMC. Kabilang dito ang mabilis at maayos na pamamahala ng trapiko, seguridad, pag-apula sa apoy, hostage negotiation, emergency medical response, at pagsasagawa ng psychological debriefing sa mga biktima.

Pinuri din nila ang Federation ng Barangay Disaster Risk Reduction and Management Council (BDRRMC) na sa lungsod pa lamang may buo at organisadong samahan. Ang naturang simulation exercises ay bahagi ng pagsasagawa ng National Disaster Resilience Month 2022 na may temang “Sambayanang Pilipino, Nagkakaisa Tungo sa Katatagan at Maunlad na Kinabukasan”.

Tumanggap ng plaque of appreciation ang Batangas City DRRMC mula sa OCD- Regional DRRMC, CALABARZON dahil sa suporta at kooperasyon nito sa pagtataguyod ng National Resilience Month. (PIO Batangas City)

• < Prev
• Next >